د غزني اوسېدونکي: که د غزني امنیت ته پام ونشي د سقوط امکان یې شته دی

د غزني اوسيدونکي وايي چې په دې وروستيو کې يو ځل بيا په دغه ولايت کې امنيتي ستونزې ډېرې شوي چې له امله يې خلک سخت په انديښنه کې دي. دوى وايي که چيرې په دغه ولايت کې د امنيت د ټينګښت لپاره جدي اقدامات ونه شي د سقوط امکان يې هم شته دى. د غزني د ولايتي شورا غړي عصمت الله جامرادوال وويل چې د غزني ښار ترڅنګ په ولسواليو کې هم امنيتي وضعيت ډېر بد دى. د نوموړي د معلوماتو له مخې اندړ، ګیرو، زنخان، رشیدان، اجرستان، خوږیاڼي، واغظ او جغتو هغه ولسوالۍ دي چې د نا امنيو له امله يې مرکزونه نورو سيمو ته لېږدول شوي دي. د ولايتي شورا دغه غړى وايي چې د خلکو انديښنې دوى له اړوندو چارواکو سره شريک کړي او د امنيت د ټينګښت غوښتنه يې ترې کړې ده. د يادو څرګندونو په غبرګون کې د غزني والي وحيدالله کليمزي وويل چې د خلکو اندېښنې بې ځايه دي، ځکه طالبان ددې توان نه لري چې ولايت ته سقوط ورکړي.