بهرنیو چارو وزارت: طالبانو سره به د سولې خبرې ډېر ژر پيل شي

بهرنیو چارو وزارت ویلي، چې د طالبانو او امریکا تر منځ د خبرو لپاره هڅې پیل شوې او کیدای شي، چې د سولې خبرې ډېر ژر بیا پیل شي. د بهرنیو چارو وزارت ویاند صبغت الله احمدي وايي لرې نه ده، چې د ښکېلو خواوو تر منځ د سولې خبرو اترو د بیا پیل لیدونکي شو. د راپورونو له مخې؛ نن درېیمه ورځ ده، چې طالب استازي په اسلام آباد کې دي او د پاکستان له حکومتي چارواکو سره خبرې کوي. د بهرنیو چارو وزارت ویاند صبغت الله احمدي ویلي؛ سوله لومړیتوب دی او هیله ده، چې پاکستان په دې اړه رښتیني او عملي ګامونه پورته کړي. د امریکا او طالبانو تر منځ د سولې خبرې یوه میاشت مخکې د امریکا ولسمشر ډونالد ترمپ هغه مهال ودرولې، چې د کابل په شش درک کې یو امریکایي سرتېری او ۱۱ افغانان په یوه چاودنه کې ووژل شول.