په پاکستان کې د امریکايي او طالب پلاوي تر خبرو اترو وروسته، تازه په افغانستان کې له طالبانو سره د زندانیانو تبادله شوې ده. طالب سرچینو رسنیو ته ویلي چې د دوی ۱۱ مهم مشران او قومندانان د هندي انجنیرانو د خوشې کولو په مقابل کې خوشې شوي دي، خو دا لا نه ده روښانه چې د دغو بندیانو د خوشې کولو شرایط څه وو.
طالب پلاوي او د افغان سولې لپاره د امریکا د بهرنیو چارو وزارت استازي زلمي خلیلزاد په پاکستان کې سره ولیدل او ویل کېدل چې د ځینو زندانیانو د تبادلې تر څنګ یې د سولې پر مسایلو هم خبرې کړې دي. تازه رسنیو داسې راپورونه خپاره کړي چې د طالبانو ۱۱ مهم مشران او وتلي قومندانان د دریو هندي انجنیرانو په مقابل کې خوشې کړل شوي دي.
طالب سرچینو بي بي سي پښتو ته منلې چې په افغانستان کې یې ۱۱ بندیان له هغو دریو هندي انجنیرانو سره تبادله شوي، چې څه موده وړاندې په افغانستان کې د کار پر مهال تښتول شوي وو. سرچینې وایي، په خوشې شویو طالبانو کې د کونړ لپاره د دوی یو نومول شوی والي او ځینې نور قوماندانان دي. طالب سرچینو ویلي چې دوی د بندیانو د خلاصون پر مسئلې په اسلام آباد کې د افغانستان د سولې لپاره د امریکا له ځانګړي استازي زلمي خلیلزاد سره خبرې کړې دي. هغه مهال په رسنیو کې داسې راپورونه خپاره شول چې ګواکې طالبانو او امریکایي لوري د امریکایي پوهنتون د دوو تښتول شوو استادانو د خلاصون پر سر خبرې کړې دي؛ خو اوس د ګنګوسو پر خلاف دری هندي انجنیران له ۱۱مهمو طالب قومندانانو سره تبادله شوي دي.
طالب سرچینې وایي چې په خوشې شوو کې د دریو مهمو کسانو هویت معلوم شوی، خو د نورو په اړه معلومات نشته دي. له دې ډلې د کونړ لپاره د طالبانو نومول شوی والي شیخ ابراهیم او د نیمروز لپاره د طالبانو نومول شوی والي مولوي عبدالرشید بلوڅ شامل دي. د دوی ترڅنګ، د حقاني کورنۍ یو غړی هم په خوشې شوو کسانو کې شته. دا کس عزیزالرحمن نومېږي او په احسان الله مشهور دی چې د سراج الدین حقاني خوریی کېږي او له ۱۲ کلونو راپدېخوا بندي و.
طالبان دا هم وایي چې د دغو کسانو د خلاصون په اړه له امریکایي لوري سره خبرې شوې وي، خو پر دې مسئله افغان حکومت تر اوسه غبرګون نه دی ښودلی. سره له دې چې تر دې مخکې هم افغان حکومت د طالبانو ځینې بندیان خوشې کړي وو، خو د تازه پېښې په اړه یې څه نه دي ویلي. امریکا او طالبانو د دوحې په مذاکراتو کې هم په ځلونو د بندیانو پر خوشې کولو بحثونه کړي وو.
ویل کېږي چې خوشې شوي کسان په بغلان ولایت کې طالبانو ته سپارل شوي. تر دې وړاندې په کابل د امریکايي پوهنتون د دوو تښتول شویو امریکايي پروفیسرانو خوشې کېدو ته تمه وه، خو داسې نه ښکاري چې طالبان او امریکایان تر اوسه په دې اړه کومې پایلې ته رسېدلي وي. اوسمهال له افغان حکومت سره د طالبانو یو لوړپوړی بندي چارواکی انس حقاني دی، چې د دې ډلې د یو مشر سراج الدین حقاني ورور دی او له څو کلونو راهیسي بندي دی.
تر اوسه لا پوره نه ده روښانه شوې چې طالبانو او امریکا به په پاکستان کې پر نورو کومو مواردو هوکړه کړې وي، خو ځينو رسنیو تازه ویلي چې د سولې د خبرو پر بیا پیل هم بحثونه شوي دي. رویټرز ته ځینو سرچینو ویلي چې زلمي خلیلزاد له طالبانو سره په لیدنه کې د نورو مسایلو تر څنګ، دا هم ویلي چې ښایي د سولې خبرې بیا پيل شي.
