سره له دې چې د ټاکنو خپلواک کمېسیون د تلې په ۲۶مه د لومړنیو پایلو د اعلان خبره کړې ده، تازه د دغه کمېسیون یوه غړي ویلي چې ښایي په ټاکلې نېټه ابتدايي پایلې اعلان نه شي کړی. د ټاکنو خپلواک کمېسیون کمېشنر مولانا عبدالله وایي، که کارونه همداسې پڅ روان وي، نو ښایي په ټاکلې نېټه لومړنۍ پایلې اعلان نه شي. بلخوا د ټاکنو خپلواک کمېسیون رییسه حوا علم نورستانۍ بیا وایي چې د دوی کارونه په سمه توګه مخ ته روان دي او ښايي تر ټاکلې نېټې مخکې خپلې چارې بشپړې کړي.
تر دې وړاندې هم داسې اندېښنې وې چې ښايي د ټاکنو خپلواک کمېسیون لومړنۍ پایلې په ټاکلې نېټه اعلان نه شي کړی، خو په لومړي ځل د دغه کمېسیون یوه غړي ویلي چې د ابتدايي پایلو اعلان ښايي وځنډېږي. د ټاکنو خپلواک کمېسیون کمېشنر مولانا عبدالله وایي، کارونه پڅ مخ ته روان دي او که همداسې روان وي، د ابتدايي پایلو اعلان به وځندېږي. مولانا عبدالله پر خپله ټویټر پاڼه لیکلي، چې تر اوسه له نږدې ۲۷ زرو محلونو، د ۱۴ زرو بایومټریک دستګاوو نهايي معلومات د کمېسیون سرور ته انتقال شوي او که دا بهیر په همدې بڼه روان وي، د تلې په ۲۷مه د ابتدايي پایلو اعلان نا ممکن دی. نوموړی وايي: ((له ۲۶ زرو او ۵۶۸ محلونو تر دې مهاله د ۲۲ زرو او ۴۰۰ دستګاوو ابتدايي معلومات او ۱۴ زرو دستګاوو نهايي معلومات د کمېسیون سرور ته انتقال شوي، که دغه بهیر په همدې بڼه روان وي، د ولسمشرۍ ټاکنو د ابتدايي پایلو اعلان د میزان په ۲۷مه نا ممکن دی)).
خو د دې څرګندونو په غبرګون کې د ټاکنو خپلواک کمېسیون مشره حوا علم نورستانۍ وایي، چې کارونه له مهالوېش سره سم روان دي او په ټاکلې نېټه به لومړنۍ پایلې اعلان کړل شي. د نوموړې په خبره، ښايي د دوی کارونه د پایلو تر اعلان ډېر مخکې بشپړ شي. هغه وايي، تر اوسه یې د ۲۶ ولایتونو جمع بندې ختمه کړې او پاتې نورو باندې کار روان دی. نورستانۍ وايي: ((موږ ژمن یو چې د تلې په ۲۷مه لومړنۍ پایلې اعلان کړو. خو بیا هم دا تخنیکي مسایل دي. کله د کار چټکتیا ډېره وي او کله کمه، خو موږ باوري یو چې تر ټاکلي مهالوېش مخکې به خپل کارونه بشپړ کړو)).
تر دې وړاندې ځینو ناظرو بنسټونو هم دا ویلي وو، چې ښايي د ټاکنو خپلواک کمېسیون په ټاکلي وخت لومړنۍ پایلې اعلان نه شي کړی. بلخوا ځينې بهرني ناظران او کابل کې مېشت سفیران د ټاکنو کمېسیون د کار په اړه ډاډ ورکوي. په کابل کې د امریکا سفارت ویلي وو، د ټاکنو کمېسیون یوازې هغه رایو ته ارزښت ورکوي چې شفافې او بایومټریک شوې وي. دوی ټینګار کوي چې د ټاکنو کمېسیون په سمه توګه مخ ته روانې دي او شفافیت ته ژمن دي.
له دې سره همماله په کابل کې د کاناډا سفیر، د ټاکنو له کمېسیونه د لیدنې پر مهال ویلي، چې په ټاکنیزو کمېسیونونو کې د شفافیت لپاره له موجودو میکانېزمونو هرکلی کوي او وایي چې د کارونو له بشپړېدو وروسته به ابتدايي نتایج اعلان شي. نوموړی وايي: ((د ټاکنو کمېسیون میکانېزم او پروسیجرونه مې ولیدل، د دوی په ژمنتیا او شفافیت باور لرم. تر اوسه د کمېسیون په کارونو کې هېڅ ډول ستونزه نشته او ټاکنیز کمېسیونونه به د خپلو کارونو له بشپړولو وروسته نتایج اعلان کړي)).
بلخوا د ټاکنو خپلواک کمېسیون مسوولان وایي، چې د دواړو انتخاباتو کمېسیونونو د مشترکې پریکړې پر اساس، دوی یوازې بایومټریک رایو ته اعتبار ورکوي. د دوی په خبره، د شفافیت په برخه کې به هېڅ فشار ته تسلیم نه شي او هېڅ وخت به هغه رایې ونه شمېرل شي چې بایومټریک شوې نه وي.
