کابل کې د امریکا سفارت: د رایو پر بنسټ کره پایلې تر ژر اعلان غوره دي

په کابل کې د امریکا سفارت له ټولو ښکېلو لوریو غوښټنه کړې ده چې د ټاکنو کمیسیون له لورې د پایلو اعلان په اړه ټاکلي مهالوېش ته دې درناوی وکړي. سفارت ټینګار کړی دی چې د رایو پر بنسټ کره پایلې تر ژر اعلان غوره دي نو باید له حوصلې کار واخیستل شي څو کمیسیون خپل کارونه په سړه سینه مخته یوسي. دا په داسې حال کې ده چې په دې وروستیو کې یو شمېر نوماندانو د ټاکنو کمیسیون پر ټکني کار نیوکه کړې او ویلي یې دي چې باید هر څومره ژر پایلې اعلان شي. په ورته وخت کې د ټاکنو کمیسیون ځینې غړو هم شکایت کړی دی چې ځینې نوماندانو ورباندې فشار راوړی دی څو پایلې ژر اعلان کړي چې یاد کمیسیون دا چاره په ټاکنو کې د لاسوهنې په مانا بللې او د نه لاسوهنې غوښتنه یې کړې ده. د ټاکنو کمیسیون د مهالوېش له مخې ټاکل شوې د ولسمشرۍ ټاکنو لومړنۍ پایلې د تلې میاشتې په ۲۷مه او وروستۍ هغه یې د لړم په ۱۶مه نېته اعلان شي.