د ټاکنو خپلواک کمېسیون په چارو کې د ستونزو له امله ښایي لومړنۍ پایلې په ټاکلې نېټه اعلان نه شي. د ټاکنو خپلواک کمېسیون یوه کمیشنر له رسنیو سره په خبرو کې ویلي، دوی ته تر سرعت دقت مهم دی، نو ځکه به د ټاکنو د لومړنیو پایلو اعلان څو ورځې وځنډېږي. بلخوا د ټاکنو کمېسیون وايي چې مرکزي بانک ته د اطلاعاتو د لېږد بڼه یې بدله کړې ده. دوی وایي، په دې سره به یې په کارونو کې چټکتیا رامنځ ته شي.
سره له دې چې د ټاکنو خپلواک کمېسیون او د ولسمشریزو ټاکنو د نوماندانو ټاکنیز ټیمونه په ټاکل شوې نېټه د پایلو پر اعلان ټینګار کوي، خو د ټاکنو کمېسیون یو غړی وایي چې د لومړنیو پایلو په اعلان کې به ځنډ راشي. د ټاکنو خپلواک کمېسیون کمېشنر مولانا عبدالله وایي، دوی شفافیت ته ژمن دي، نو د شفافیت د رامنځ ته کولو لپاره وخت ته اړتیا لري. د مولانا عبدالله په خبره، په دقیقه توګه نه شو ویلی چې د پایلو اعلان به څو ورځې وځنډېږي، خو تر ټاکلې نېټې به یوازې په څو ورځې ځنډ اعلان کړل شي. عبدالله وايي: ((کره یې نه شم ویلی چې څومره به وځنډېږي، خو یوازې یو څو ورځې به په ځنډ اعلان شي، موږ کره والی د سرعت قرباني کولی نه شو)).
د ټاکنو خپلواک کمېسیون رییسې بیا تر دې وړاندې د لومړنیو پایلو د اعلان ځنډېل رد کړي وو او په خبره یې، پایلې به د مهالوېش له مخې اعلانېږي. په همدې اړه د ټاکنو خپلواک کمېسیون یو بل غړی اورنګزیب بیا وایي، له بایومټریک دستګاوو د معلوماتو ملي مرکز ته د اطلاعاتو د لېږد بهیر له ځینو ستونزو سره مخ شو، چې له همدې امله د دوی چارې یو څه ټکنۍ شوې. هغه زیاتوي چې دوی د ستونزې د حل لپاره مرستیال مرکز پرانیستی دی او دمګړۍ چارې په سمه توګه پر مخ ځي. اورنګزیب وایي، ډېر ژر به ټول اطلاعات د معلوماتو ملي مرکز ته ولېږدول شي او پایلې به هم په خپله ټاکلې نېټه اعلان کړل شي. نوموړی زیاتوي: ((زموږ لپاره وخت مهم دی چې باید ور سره سم مخکې لاړ شو او د همدې مهالوېش له مخې پایله له خلکو سره شریکه کړو، خو هڅه به دا وي چې شفافه نتیجه خلکو ته اعلان کړو)).
بل پلو د ټاکنو خپلواک کمېسیون ځینې نور غړي وایي، چې د اطلاعاتو د لېږد بڼه یې بدله کړې ده. د وای فای له لارې له بایومټریک دستګاوو د اطلاعاتو په لېږد کې د ستونزو تر رامنځ ته کېدو وروسته، د ټاکنو خپلواک کمېسیون له ټاکنیزو ټیمونو سره په همغږۍ اوس د لېږد بڼه بدله کړې ده. ټاکل شوې چې تر دې وروسته ټول اطلاعات په بایومټریک دستګاوو کې له نصب شوي چپ ولېږدول شي او د معلوماتو په مرکزي بانک کې ذخیره کړل شي. تر دې دمه د ۲۲۵۸۸ بایومټریک دستګاوو اطلاعات د معلوماتو مرکزي بانک ته لېږدول شوي دي. سرچینو ویلي چې ۲۳۰۰ بایومټریک دستګاوې د تخنیکي ستونزو له امله قرنطین شوې دي. د ټاکنو خپلواک کمېسیون بیا په تېرو ولسمشریزو ټاکنو کې له ټولټال ۲۶ زره بایومټریک دستګاوو استفاده کړې وه.
له دې سره هممهاله ټاکنیز ټیمونه دا وېره هم لري چې ښایي بې بایومټریکه رایې هم وشمېرل شي او په دې توګه د ولس حق تر پښو لاندې شي. خو د ټاکنو خپلواک کمېسیون وایي چې دوی یوازې بایومټریک شوې رایې شماري او همدا رایې ورته د باور وړ دي. د دغه کمېسیون یو کمېشنر مولانا عبدالله وایي: ((یوازې هغه رایې باوري دي، چې د بایومټریک دستګا کې ثبت دي)).
له دې سره پر ټاکنو څارونکي بنسټونه په ټاکنو کمېسیون کې پر ستونزو نیوکه کوي او وایي، له تېرو تجربو سره سره دوی بریالي نه شول چې ستونزې حل کړي. دوی له مهالوېش سرغړونه یا د لومړنیو پایلو په اعلان کې ځنډ غیر قانوني عمل بولي، خو بیا هم ټینګار کوي چې شفافیت ته باید لومړیتوب ورکړل شي.
