د ټاکنو خپلواک کمېسیون وایي، مرکزي سرور ته د معلوماتو د لېږد په پروسه کې ټولې ستونزې ختمې شوې دي او د دوی کارونه په چټکۍ سره مخ ته روان دي. د ټاکنو خپلواک کمېسیون غړو پرون په یوه خبري غونډه کې د خبرو پر مهال وویل، چې د نږدې ۸۵ سلنه مرکزونو رایې مرکزي سرور ته لېږدول شوې دي او د پاتې نورو رایو پر لېږد هم کار روان دی. د کمېسیون مشرې حوا علم نورستانۍ وویل چې ټولې ستونزې حل شوې دي او په کارونو کې اړین چټکوالی رامنځ ته شوی دی.
سره له دې چې د ټاکنو په کمېسیون کې د کارونو پر ځنډ نیوکې موجودې دي، خو تازه دغه کمېسیون وایي چې چارې یې په ښه توګه پر مخ ځي. د ټاکنو کمېسیون اعلان کړی چې د دې کمېسیون مرکزي سرور ته د ۲۲ زرو او ۵۸۸ ټاکنیزو محلونو د رایو په لېږدولو کې معلومه شوې چې په ولسمشریزو ټاکنو کې شاوخوا یو میلیون او ۷۰۳ زره او ۷۷۳ بایومټریک شوې رایې کارېدلې دي. د ټاکنو کمېسیون تر دې وړاندې ویلي وو چې په ۶۸۴ ټاکنیزو محلونو کې دوه میلیونه ۶۹۵ زره او ۸۹۰ رایې اچول شوې وې.
د ټاکنو کمېسیون مشره حوا علم نورستانۍ وايي، تر اوسه د څه باندې یو میلیون رایه اچوونکو ټول معلومات مرکزي سیسټم ته لېږدول شوي دي. د ټاکنو کمېسیون غړې رحیمه ظریفي وايي، له څه باندې ۲۲ زرو ټاکنیزو محلونو شاوخوا ۱،۷ میلیونه بایومټریک شوې رایې د ټاکنو کمېسیون مرکزي سرور ته لېږدول شوې دي. نوموړې زیاتوي، ۳۹۰۰ محلونه پاتې دي چې رایې یې تر اوسه مرکزي سرور ته نه دي لېږدول شوې.
د ټاکنو کمېسیون داسې مهال په کارونو کې د چټکوالي خبره کوي، چې تېره ورځ ځینو کمېشنرانو د لومړنیو پایلو د اعلان له ځنډه خبر ورکړی و. د ټاکنو کمېسیون یوه کمېشنر مولانا عبدالله ویلي وو، چې د رایو په شمېرنه کې د ځنډ او دغه راز د شفافیت لپاره ښایي د لومړنیو پایلو په اعلان کې ځنډ راشي. تېره ورځ ځینو نورو غړو هم د لومړنیو پایلو په اعلان کې د ځنډ راتګ تایید کړی، خو وایي چې ښایي دا ځنډ دوې یا دری ورځې وي.
د ټاکنو کمېسیون غړی مولانا محمد عبدالله پرون په خبري غونډه کې وویل، چې دوی د ټاکنو د شفافیت تضمین کوي او اجازه نه ورکوي چې شفافیت تر پوښتنې لاندې راشي. د ده په خبره، په ټول افغانستان کې له څه باندې ۲۹ زرو ټاکنیزو محلونو څخه شاوخوا ۳۰۰۰ محلونه تړلي اعلان شوي وو. هغه زیاته کړې، وروسته له دې چې ټول معلومات مرکزي سرور ته ولېږدول شي، نو دا به ثابته شي چې څومره محلونه پرانیستي وو او په څومره کې رایې کارېدلې دي. هغه وايي، پاکې او تقلبي رایې د بایومټریک د الو او د نوماندانو د رایو کچه د پایلو د جدول پر بنسټ جوتیږي. د ده په خبره، د ټاکنو کمېسیون په بایومټریک کې ثبت شوې رایې د پایلو له جدول سره پرتله کوي او له دې لارې سمې او ناسمې رایې ښکاره کېږي.
ټاکنو کمېسیون ټینګار کړی چې یوازې بایومټریک رایې ورته د منلو وړ دي او له دې پرېکړې یې ملګرو ملتونو یو ځل بیا ملاتړ کړی دی. یوناما په تازه څرګندونو کې ویلي چې د ټاکنو خپلواک کمېسیون شفافیت ته ژمن دی او د بایومټریک رایو په اړه د دغه کمېسیون د پرېکړې هرکلی کوي. یوناما ویلي وو، چې ټاکنیز کمېسیونونه د ملګرو ملتونو بشپړ ملاتړ له ځان سره لري او کاندیدان هم اړ دي چې د دوی پرېرکړو ته درناوی وکړي. تر دې وړاندې اروپايي ټولنې او ځینو نورو مرستندویه هېوادونو هم د کمېسیون له پرېکړو د ملاتړ اعلان کړی و او پر نوماندانو یې غږ کړی چې د دغو کمېسیونونو پرېکړو ته درناوی ولري.
