پوهنې وزارت: سږ کال ۸۴۲ زره زده کوونکي ښوونځیو ته جذب شوي دي

پوهنې وزارت وايي، سږکال په ۲۷ ولایتونو کې په سړو سیمو کې شااوخوا ۸۴۲ زره زده کوونکي چې ۴۳ سلنه یې نجونې جوړوي، ښوونځیو ته جذب شوي دي. د پوهنې وزارت ویانده نوریه نزهت وايي، چې د تېرکال په پرتله د زده کوونکو د جذب شمېر سږکال ۷۰ زره پورته دی. اوسمهال د نویو زده کوونکو د جذب لړۍ په کندهار، هلمند، فراه، لغمان، کونړ، نیمروز او ننګرهار کې روانه ده. پوهنې وزارت د زده کوونکو د جذب زیاتوالی د دې وزارت عامه پوهاوی او د ۷۵۰۰ ښځينه ښوونکو جذب یادوي. پوهنې وزارت په داسې حال کې د زده کوونکو د زیاتوالي خبره کوي چې د راپورنو په اساس، ۵۰ سلنه ښوونځي په ټول افغانستان کې د پلازمېنې په ګډون اوس هم ودانۍ نه لري.