زلمی خلیلزاد: امریکا په افغانستان کې سیاسي جوړجاړي ته ژمنه ده

د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد تازه په خپلو ټوېټونو کې ویلي چې امریکا په افغانستان کې سیاسي جوړجاړي او د روانې جګړې پای ته رسولو ته ژمنه ده. دده په خبره د امریکا د پوځ له نوي لوی درستیز سره یې کتلي دي او د افغانستان د اوضاع په اړه یې خبرې ورسره کړې دي. خلیلزاد وایي دوی هڅه کوي چې افغان جګړه د خبرو له لارې حل کړي او د امریکا نوی لوی درستیز هم دې ته ژمن دی چې دلته روانه جګړه ختمه شي او افغانستان ته دایمي ثبات راشي. دده په خبره نوی لوی درستیز به د تاوتریخوالي د کمولو لپاره هم خپلې هڅې جاري ساتي. خلیلزاد دغه راز ټینګار کړی چې امریکا به په افغانستان کې د دوو لسیزو لاس ته راوړنې هم ساتي او تر څنګ به یې کوښښ کوي چې روانه جګړه د سیاسي جوړجاړي له لارې حل کړي. د طالبانو او امریکا ترمنځ د مذاکراتو تر لغوه کېدو وروسته دا د خلیلزاد تازه څرګندونې دي چې د روانې جګړې د سیاسي حل په اړه یې کړې دي.