ملګري ملتونه: پر عبادت کوونکو وحشیانه بریدونه د توجیه وړ ندي

په کابل کې د ملګرو ملتونو سیاسي استازولۍ (یوناما) په ننګرهار کې د تېرې جمعې شوی برید غندلی او زیاته کړې یې ده چې پر عبادت کوونکو بریدونه په هیڅ ډول د توجیه وړ ندي. د یوناما له لوري په خپرې شوې تازه خبرپاڼه کې راغلي، د دوی لومړنۍ موندنې ښیي چې په دې برید کې ۶۳ ملکي وګړي وژل شوي او ۶۴ نور ټپیان دي. سرچینې د افغانستان لپاره د ملګرو ملتونو د ځانګړي استازي تدامیچي یاماموتو له قوله ویلي، دغه ډول ناوړه او بې موخې بریدونه چې ملکیان په نښه کوي په هیڅ ډول د توجیه وړ ندي. هغه زیاته کړې، هغه کسان چې په دې برید کې لاس لري باید محاکمې ته راکاږل شي. یاماموتو زیاته کړې، پر لونځ کوونکو دغه ډول وحشیانه بریدونه بشري جنایت دی او ښایي جنګي جرمونه وبلل شي. د سرچینې په خبره، ملګري ملتونه له ټولو افغانانو سره د یووالې په برخه کې خپل ملاتړ ته دوام ورکوي او د افغانانو په مشرۍ د سولې بهیر ملاتړ ته ژمنه ده، څو هر څومره ژر په دې هېواد کې روانې بدمرغې جګړې ته د پای ټکی کېښودل شي.