کاپیسا کې چاودنې درې ملکي وګړي وژلي

د کاپیسا ولایت امنیتي چارواکي وایي چې د دغه ولایت په اله سای ولسوالي کې د ماین چاودنې له امله د دوو نظامیانو په ګډون لس ملکي وګړو ته مرګ ژوبله اوښتې ده. د کاپیسا د پولیسو د رسنیو مسوول شایق شورش ویلي، دا پېښه تېره ورځ ناوخته د اله سای ولسوالي په بازار کې رامنځته شوې ده چې له امله یې درې ملکي وګړي وژل شوي او د دوو نظامیانو په ګډون اووه تنه نور ټپیان شوي دي. د شورش په خبره، دا ماین د دې ولسوالۍ په بازار کې د افغان ځواکونو د په نښه کولو لپاره ځای پر ځای شوی و. هغه زیاته کړې، د پېښې ټپیان د دغه ولایت مرکزي روغتون ته لېږدول شوي دي او روغتیایي حالت یې د ډاډ وړ دی. که څه هم د پېښې پړه پر طالبانو اچول شوې خو یادې ډلې تر اوسه په دې اړه څه نه دي ویلي.