په دې وروستیو کې په هېواد کې د بیان ازادۍ پر وړاندې د خنډونو پیدا کېدو په تړاو اندېښنې زیاتې شوې دي او داسې وېره شته چې ګواکي ځینې کړۍ غواړي د خلکو غږ چوپ او ولسواکي په ملا ماته کړي. په همدې تړاو پرون پخواني ولسمشر حامد کرزي هم خبري کنفرانس درلود او ویې ویل چې په وروستیو دریو کلونو کې د بیان ازادي په هېواد کې خورا ترینګلی وضعیت لري. نوموړي پر حکومت غږ وکړ چې د بیان ازادۍ ته درناوی ولري او د دغه مهمې لاس ته راوړنې ساتنه وکړي.
په دې وروستیو کې په هېواد کې پر ځينو سیاسي شنونکو بریدونه وشول. همدا راز داسې راپورونه شته چې په رسنیزو بحثونو کې ګډون کوونکي، سیاسي شنونکي او خبریالان ګواښل کېږي او نامعلوم کسان ترې غواړي چې نور په بحثونو کې برخه وا نه خلي. په همدې تړاو او په هېواد کې د بیان ازادۍ پر څرنګوالي پرون پخواني ولسمشر حامد کرزي هم خبري کنفرانس درلود. نوموړي په دې خبري کنفرانس کې وویل، د تېرو اتلسو کلونو لاس ته راوړنې یو اسلامي جمهوریت او بله د بیان ازادي ده چې باید وساتل شي. د ده په خبره، که له ولس د خبرو او وینا او همدا راز نظر څرګندولو حق اخیستل کېږي، نو ولسواکي زیانمنېږي او جمهوریت مانا نه لري.
پخواني ولسمشر پرون په خبري کنفرانس کې وویل چې د بیان د ازادۍ پر وړاندې خنډونه او ګواښونه مخ پر زیاتېدو دي او په وروستیو دریو کلونو کې د بیان ازادي په تر ټولو ترینګلي وضعیت کې ده. کرزي ویلي، کارپوهان او هغه کسان چې په ټلویزیوني یا راډیويي بحثونو کې راڅرګندېږي، ګواښل کېږي او تر ډېره هغه کسان چې مخالف غږ لري ټپي شوي او ان وژل شوي دي.
ښاغلي کرزي په کابل کې د وحید مژده وژل کېدو ته په اشارې دا هم وویل، چې د سولې له هڅو سره سم ځینې هغه کسان هم ګواښل کېږي چې د سولې په برخه فعالیت کوي، نظر شریکوي او په رسنیزو بحثونو کې راڅرګندېږي. د هغه په خبره، له دې ډلې کسانو لومړنی کس ملا سلام ضعیف و، چې د مسکو له کنفرانس تر راتګ وروسته یې کور محاصره شو او وګواښل شو.
نوموړي په دې خبري کنفرانس کې له اروپايي ټولنې، امریکا او نورو مرستندویه هېوادونو وغوښتل چې په افغانستان کې د بیان د ازادۍ په ساتنه کې همکاري وکړي. کرزي زیاته کړه چې دغه هېوادونه له افغان حکومت سره د ولسواکۍ د تامین او بیان ازادۍ د موجودیت پر سر همکاري او مرسته کوي، نو اوس د دې وخت دی چې په افغانستان کې له ګواښ سره مخ د بیان ازادي هم وساتي او ملاتړ یې وکړي.
ښاغلي کرزي دغه راز په هېواد کې روان وضعیت د اندېښنې وړ وباله او پر ولسمشر غني یې غږ وکړ چې له ولس سره په همغږۍ د روان بحران په ختمولو کې خپلې رښتینې هڅې وکړي. کرزي وویل: ((هېواد همدا اوس په بحران کې دی. هره ورځ ځوانان له خپلې خاورې تښتي. ناامني او بېکاري ده. دوی د خپلې راتلونکې او سبا په اړه هیلې نه لري، نو تېښته ورته غوره ښکارېږي)).
پخواني ولسمشر وړمه ورځ هم په یوه مرکه کې پر حکومت غږ کړی و چې د سولې لپاره هڅې ډېرې کړي او د سولې لپاره له رامنځ ته شوي فرصت څخه ګټه واخلي. هغه ویلي وو چې امریکا له کلونو جګړې وروسته اوس په افغانستان کې د سولې راوستو لپاره زړه ښه کړی دی، نو حکومت ته نه ده پکار چې خنډونه جوړ کړي او دغه پروسه وځنډوي.
پخوانی ولسمشر داسې مهال د سولې او بیان ازادۍ په اړه دغه خبرې کوي، چې حکومت ځان د بیان د ازادۍ او سولې ملاتړی بولي. د ولسمشر ویاند صدیق صدیقي ویلي چې دوی په تېرو کلونو کې د خبریالانو د خوندیتوب لپاره د پام وړ ګامونه اوچت کړي دي او سوله هم ورته لومړیتوب لري او په دې برخه کې هڅې کوي.
