د ولسمشریزو ټاکنو له نامعلوم برخلیک سره هممهاله ټاکنیزو ډلو د نوو غبرګونونو لپاره تیاری ښودلی دی. د ثبات او همپالنې ټاکنیزه ډله وايي چې که تر راتلونکې اونۍ د رایو د برخلیک په اړه کمېسیون د دوی غوښتنې ونه مني، نو د اعتراضونو په یوه نوي پړاو به پيل وکړي. دا چې د اعتراضونو دغه پړاو به څه وي، په اړه یې معلومات نه دي ورکړي. بلخوا ولسمشر غني بیا تېره ورځ په یوه خبري غونډه کې د خبرو پر مهال وویل چې افغانستان نور د خبرداریو هېواد نه دی او هر څه د قانون د حاکمیت په رڼا کې حل فصل کېږي.
له ولسمشریزو ټاکنو پوره دوې میاشتې واوښتې، خو د ټاکنو خپلواک کمېسیون لا هم بریالی نه شو چې د دغو ټاکنو پایلې اعلان کړي. سره له دې چې د ټاکنو خپلواک کمېسیون د پایلو د اعلان او په ټاکنو کې د شفافیت لپاره میلیونونه ډالر ولګول او بایومټریک سیسټم یې وپېره؛ خو بیا هم کمېسیون د پایلو پر اعلان او د مهالوېش په عملي کولو بریالی نه شو. د ټاکنو خپلواک کمېسیون پخوانۍ رهبري هم په همدې موخه بدله شه، چې نوې رهبري وکړی شي پر وخت او شفافې ټاکنې مدیریت کړي، خو د شنونکو په باور، کمېسیون یې په چارو کې ناکا م دی.
تازه د ډاکټر عبدالله عبدالله په مشرۍ ټاکنیزه ډله وايي، په ډېرو ولایتونو کې یې د رایو د بیاشمېرنې مخه نیولې ده او اعتراضونه یې دوام لري؛ خو که یې کمېسیون غوښتنو ته ځواب ونه وایي، د اعتراضونو نوی پړاو به پيل کړي. دې ټاکنیزې ډلې ویلي، که ټاکنو کمېسیون تر راتلونکې شنبې د دوی له خوا پیژندل شوې مشکوکې رایې باطلې نه کړي، دوی به اعتراضونو ته نوی رنګ ورکړي.
د دغې ټاکنیزې ډلې لومړي مرستیال عنایت الله بابر فرهمند پرون په یوه غونډه کې له خپلو پلویانو وغوښتل چې په اوو ولایتونو کې د پيل شویو اعتراضونو ملاتړ ته ور ودانګي. هغه وویل: ((اوس عملاً اعلانوو، د افغانستان ټول خلک دې چې د خطرونو په قبلولو سره یې د خپل برخه لیک ټاکلو په موخه رایه ورکړه، اوس دې د خپل مسوولیت د ادا کولو لپاره د ۷ ولایتونو له معترضینو سره یوځای شي، که د شنبې تر ورځې کمېسیون تقلبي رایې باطلې نه کړې، مونږ به د اعتراضونو یو نوی څپرکی پرانیزو)).
د عبدالله عبدالله ټاکنیزه ډله پر شاوخوا دریو لکو رایو اعتراض لري چې د دوی په خبره، له ټاکلي وخت مخکې صندقونو ته لوېدلې او یا یې هم د کارولو بڼه او څرنګوالی معیاري نه دی. یاده ټاکنیزه ډله وایي، کمېسیون باید لومړی دغه شمېر رایې باطلې کړي او بیا په ولایتونو کې مشکوکې رایې بیا وشمېري. د ټاکنو کمېسیون او د ثبات او همپالنې ډلې تر منځ نانندرۍ هم د همدې موضوع پر سر پيل شوې چې له امله یې په ۷ شمالي ولایتونو کې همدغه ټیم د ټاکنو د دفترونو دروازې تړلې دي.
د ټاکنو کمېسیون تر دې وړاندې ویلي وو چې دوی ته باید د رایو د بیاشمېرنې اجازه ورکړل شي او دوی په دې توګه کولی شي سمې او ناسمې یا پاکې او باطلې رایې سره بېلې کړي. د اعتراضونو له خبرداري سره هممهاله ولسمشر غني بیا ویلي چې ټول باید قانون ته درناوی وکړي.
ولسمشر غني چې پرون یې په کابل کې یوې غونډې ته خبرې کولې وویل، اوس د ناندریو وخت تېر شوی دی او ټول باید قانون ته درناوی وکړي. د ده په خبره، ملي امنیتي ځواکونه د قانون ساتندوی دي او اجازه نه ورکوي چې څوک قانون تر پښو لاندې کړي.
د ثبات او همپالنې ټاکنیزې ډلې تر دې وړاندې هم د اعتراضونو خبرداری ورکړی و او ویلي یې وو چې که د ټاکنو خپلواک کمېسیون یې غوښتنو ته پام ونه کړي، نو دوی به خپل اعتراضونه پراخ کړي. د ولسمشر غني په مشرۍ دولت جوړوونکي ټیم بیا پر ټاکنیزو ډلو غږ کړی چې د ټاکنو خپلواک کمېسیون دې خپلو چارو ته پرېږدي او قانون ته دې درناوی وکړي.
د ټاکنو خپلواک کمېسیون ویاند ذبیح الله سادات د ثبات او همپالنې ټیم د څرګندونو په اړه ویلي، دغه ټاکنیزه ډله دې له دوی سره همکاري وکړي چې په پاتې ولایتونو کې د رایو بیاشمېرنه بشپړه شي. بلخوا تر دې وړاندې د دغه کمېسیون د دارلانشا مشر ویلي وو، که په ۷ ولایتونو کې اعتراضونه دوام کوي، دوی به د شته رایو او په ۲۵ ولایتونو کې د بیاشمیرنې د پایلو له مخې، پرېکړه وکړي.
