ولسمشر غني په هېواد کې د وروستیو بریدونو په غبرګون کې امنیتي ځواکونو ته امر وکړ چې له دفاعي حالته ووځي او یرغلیز حالت خپل کړي.
ولسمشر د کابل ، ننګرهار او په هېواد کې د وروستیو نورو بریدونو په اړه د ملي ټلوېزیون له لارې ولس ته په خپله وینا کې وویل: «خدای مو له کرونا او د ترهګرو له بریدونو وساته.»
هغه زیاته کړه، د طالبانو ډلې په دې وروستیو کې د سولې لپاره د حکومت ، ولس او نړیوالې ټولنې له پرله پسې غوښتنو سره سره اوربند نه دی منلی او خپلو بریدونو ته یې ادامه ورکړې ده.
ولسمشر غني وویل چې طالبانو او داعش همدا نن(پرون) په کابل کې پر روغتون ، ننګرهار کې پر جنازې او د هېواد نورو سیمو کې بریدونه کړي دي.
د نوموړي په وینا، په دې بریدونو کې د ښځو او ماشومانو په ګډون لسګونو هېوادوالو ته مرګ ژوبله اوښتې او دا بریدونه یې په کلکه وغندل.
ده زیاته کړه، چې د ولس، علماوو، حکومت او نړیوالې ټولنې له خوا د سولې او اوربند لپاره له پرله پسې غوښتنو سره سره طالبانو دغه کار ته غاړه نه ده اېښې، له افغان وژنې يې لاس نه دی اخیستی او خپلو بریدونو ته ادامه ورکوي.
ولسمشر غني وویل: (( د هېوادوالو او هېواد څخه د دفاع او د عامه ځایونو او تاسیساتو د حفاظت او د طالبانو او نورو ترهګرو ډلو د کېدونکو بریدونو د له منځه وړلو په موخه د هېواد امنیتي او دفاعي ځواکونو ته امر کوم چې له دفاعي حالته ووځي او یرغلیز عملیات پیل کړي.»
د هغه په وینا، په تکرار سره یې ویلي او بیا یې هم په ټینګار سره وایي، چې پر افغانستان تحمیل شوې بدمرغه جګړه باید پای او تلپاتې او باعزته سوله تامین شي. ده زیاته کړه، د طالبانو ډلې د پردیو په لمسون جنګ ته او د وینې تویېدنې لړۍ ته ادامه ورکړې ده.
