تر اوږدې ارامتیا وروسته په وروستیو څو ورځو کې په هېواد کې خونړیو بریدونو او نښتو یو ځل بیا زور اخیستی دی. په وروستیو ورځو کې په بلخ، ننګرهار، لغمان، خوست، کابل او ځینو نورو ولایتونو کې خونړیو نښتو ملکي وګړو او افغان سرتېرو ته مرګ ژوبله اړولې ده. پرون په تېرو څو میاشتو کې تر ټولو خونړۍ ورځ وه. په ننګرهار، کابل، بلخ او خوست کې ملکي وګړي ووژل شول. په ننګرهار او کابل کې ځانمرګو بریدونو او په بلخ کې بیا هوایي برید ناورین رامنځ ته کړ. ولسمشر غني د همدې خونړیو پېښو په غبرګون کې افغان پوځ ته د تهاجمي بریدونو امر وکړ او په نړیواله کچه هم پر دغو بریدونو غبرګونونه راوپارېدل.
پرون په کابل کې خونړۍ روژه وه. شاوخوا لس بجې د کابل ښار په دشت برچي سیمه کې وسله والو ځانمرګو د ولادي نسایي پر یوه روغتون برید وکړ. لومړی چاودنه وشوه او وروسته بیا وسله وال روغتون ته ننوتل او په نښته یې پیل وکړ. جګړه تر پنځه ساعته نښتې وروسته پای ته ورسېده. د وروستیو معلوماتو له مخې، په پېښه کې د دوو نوو زېږېدلو ماشومانو په ګډون ۱۴ کسه وژل شوي، ۱۵ ټپیان دي او د دریو بهرنیانو په ګډون سل کسه له دغه برید ژغورل شوي دي. د راپورونو له مخې، داعش ډلې د دغه برید مسوولیت منلی دی.
له دې سره څو ساعته په توپیر د ننګرهار ولایت په ښېوې ولسوالۍ کې د جنازې په مراسمو کې چاودنه وشوه. راپورونه وایي چې دا هم یو ځانمرګی برید و او ملکي وګړو ته یې سخت تلفات اړولي دي. د ننګرهار ولایت ځایي چارواکي وایي چې په پېښه کې ۲۶ کسان وژل شوي او ۶۸ نور ټپیان دي. د دغه برید مسوولیت کومې ډلې نه دی منلی. په وژل شوو کسانو کې د ننګرهار د ولایتي شورا یو غړی او په ټپیانو کې بیا په ولسي جرګه کې د دغه ولایت یو استازی هم شامل دی.
په بلخ کې بیا وړمه شپه افغان هوايي ځواکونو بریدونه کړي چې ملکي وګړو ته پکې مرګ ژوبله اوښتې ده. پرون د بلخ ولایت د بلخ ولسوالۍ اوسېدونکو د خپلو وژل شوو جسدونه یوې څلورلارې ته راوړي وو او لاریون یې کړی و. دوی ادعا کوي چې په پېښه کې ۹ کسه ملکیان وژل شوي او ۱۱ نور ټپیان دي. افغان حکومت بیا وایي چې دوی ملکیان نه، بلکې وسله وال طالبان په نښه کړي چې د سړک د ویجاړلو او پر افغان ځواکونو د بریدونو لپاره راوتلي وو.
دغه پېښې په نړیواله کچه غندل شوې دي. په افغانستان کې د ناټو ملکي استازي نېکولاس کې په ننګرهار او کابل کې پر ملکي وګړو بریدونه په کلکو ټکو غندلي او دا یې ستر جنایت بللی دی. همدا راز د بښنې نړیوال سازمان هم دغه پېښې بشري جنایت بللی دی او په خبره یې، د پېښې له عاملینو سره باید حساب کتاب وشي.
پخواني ولسمشر هم په یوه اعلامیه کې په ننګرهار، کابل او بلخ کې وروستي بریدونه غندلي دي. د ده په خبره، د سولې د روانو هڅو پر وړاندې د جګړې دوام د پردیو دسیسه ده او دوی نه غواړي هېواد ته دایمي ثبات راشي. ښاغلي کرزي په کابل او ننګرهار کې پر عام وګړو وروستي بریدونه هم بشري ضد جنایت بللی او په خبره یې، د دغه ډول وحشتونو لړۍ په کلکو ټکو غندي.
ولسمشر غني بیا پر افغان ځواکونو غږ کړی چې له دفاعي حالت راووځي او تعرضي حالت خپل کړي. د ده په خبره، د افغانستان د خلکو دښمنانو په دې وروستیو کې د سولې پر ځای جګړې شدیدې کړې او لا هم هره ورځ عام وګړي وژني. نوموړي پر امنیتي ځواکونو غږ کړی چې په ننګرهار او کابل کې د وروستیو پېښو عاملین ونیسي او پر وړاندې یې دې عملیات وکړي. هغه وویل، په ځلونو یې له طالبانو د مخامخ خبرو او سولې غوښتنه کړې، خو دغه ډله پر جګړه ټینګار کوي، نو افغان امنیتي ځواکونه یې دې پر وړاندې خپل اقدامات پيل کړي.
