په افغانستان کې د ډاکټر عبدالله او ولسمشر غني ترمنځ پر شوي جوړجاړي ګاونډیو او د افغانستان متحدو هېوادنو غبرګونونه ښودلي دي. دوی ددغه اقدام ستاینه کړې ده خو هیله یې څرګنده کړې چې دغه توافق په افغانستان کې د سولې او ثبات سبب شي.
د امریکا د بهرنیو چارو وزیر ویلي له جوجاړي هرکلی کوي. دده په خبره دواړو د سولې لپاره ژمنه کړې ده او امریکا هیله لري چې ولسمشر غني او عبدالله د سولې لپاره هڅې وکړي. دده په خبره ((د سولې په برخه کې د دوی دواړو له ژمنو هرکلی کوو)).
زلمي خلیلزاد هم ویلي چې دا یو غوره اقدام دی. ده بیا پر دواړو مشرانو غږ کړی دی چې د تېر حکومت تېروتنې تکرار نه کړي، د سولې لپاره هڅې وکړي او د طالبانو او امریکا ترمنځ ددوحې هوکړې په عملي کولو کې همکاري وکړي.
طالبان هم بې غبرګونه نه و پاتې. د طالبانو د قطر دفتر ویاند بیا په کابل کې پر روانو ناندریو غبرګون ښودلی او وایي دا هر څه د نه منلو دي. دده په وینا تر ټولو غوره لار دا ده، چې د زندانیانو تبادلې ته ادامه ورکړل شي او بین الافغاني خبرو ته تیاری وښودل شي.
ملګرو ملتونو هم ددغه توافق او جوړجاړي هرکلی کړی دی. په افغانستان کې د ملګرو ملتونو مرستندویه دفتر یا یونما ویلي هیله لري چې دغه توافق وکړی شي په افغانستان کې د ټولو قشرونو حقوق خوندي کړي. سرچینه وایي ((موږ د افغانستان له نوي حکومت سره لا ډېرو همکاریو ته ادامه ورکوو)).
چین هم ددغه توافق د لاسلیک هرکلی کړی دی. په کابل کې د چین سفیر ویلي له یوه لوی ملت سره همدا ښايي چې خپلې ستونزې پخپله حل کړي او د خپل هېواد د جوړېدو لپاره له یو بل سره لاسونه ورکړي. د وانګ یو په خبره د چین همکارۍ به په بېلو برخو کې له افغانستان سره روانې وي.
د ترکیې د بهرنیو چارو زارت هم ددې توافق هرکلی کړی دی. ددغه هېواد د بهرنیو چارو وزارت وایي دوی هیله لري چې په دې توګه ژر تر ژره افغانستان ته دایمي سوله او ثبات راشي.
هند هم د ولسمشر غني او عبدالله عبدالله ترمنځ د جوړجاړي هرکلی کوي. ددغه هېواد د بهرنیو چارو وزارت وايي دوی په افغانستان کې د سولې، یووالي، پرمختګ او دایمي ثبات غوښتونکي دي. د سرچینې په خبره دوی تل هڅه کړې چې په افغانستان کې د سولې او پرمختګ په برخه کې ګټور تمام شي او په دې هیله دي چې وروستی توافق دایمي سولې ته لار هواره کړي.
ناټو هم ددغه جوړجاړي هرکلی کړی دی. د ناټو عمومي منشي ینس سټولټنبرګ وايي، ددواړو مشرانو له پرېکړې هرکلی کوي او یو همه شموله حکومت د افغانستان په ګټه دی. دده په وینا ناټو له افغانستان سره پر خپلو ژمنو ولاړه ده او تمه لري چې دواړه مشران د سولې لپاره هم هڅې ډېرې کړي.
په کابل کې د کاناډا سفارت هم ددغه توافق هرکلی کړی دی او په خبره یې افغانان بریالي شول چې اختلافات ختم کړي او د سولې او دایمي ثبات د راوستو لپاره سره متحد شي.
تازه د برېتانیا سفارت هم په یوه اعلامیه کې ددغه توافق هرکلی کړی دی. د سرچینې په خبره دغه توافق په دې مانا ده چې له کووید۱۹ سره به پر مبارزه تمرکز وشي او دغه راز د سولې او ثبات د راوستو لپاره به هڅې چټکې شي.
