د قطر په پلازمېنه دوحه کې د طالبانو او امریکا ترمنځ مخامخ خبرې تر دوه ورځني ځنډ وروسته پرون بېرته پيل شوې دي. د دغو خبرو په اړه پوره جزیات نه دي خپاره شوي، خو رسنۍ او طالبانو ته نږدې سرچینې وايي، چې دواړه لوري پر ځينو مواردو هوکړې ته رسېدلي دي. له افغانستانه د بهرنیو ځواکونو وتل او د امریکا په ګډون د نورو هېوادونو پر وړاندې د افغان خاورې نه کارېدل، هغه دوه موارد دي چې طالبان او امریکا یې پر سر هوکړې ته رسېدلي دي.
ټاکل شوې وه چې د طالبانو او امریکا ترمنځ پنځمه غونډه کې به له افغان حکومت سره پر مخامخ خبرو او اوربند هم بحثونه وشي، خو طالبان وايي چې په دې اړه د خبرو کول لا تر وخت مخکې دي. د دوی په باور، تر هرڅه وړاندې باید لومړی د افغانستان د جګړې بهرني عوامل ختم شي او تر هغه وروسته به داخلي عواملو ته پام کوي. طالبانو په رسمي توګه دا نه دي ویلي چې پر کومو مواردو هوکړې ته رسېدلي یا نږدې شوي دي، خو طالبانو ته نږدې سرچینې بیا وايي چې د دواړو لورو ترمنځ هوکړې رامنځ ته شوې دي.
پخوانی طالب چارواکی عبدالسلام ضعیف، چې دمګړۍ په دوحه کې دی، وايي چې د طالبانو او امریکا ترمنځ پر دې هوکړه رامنځ ته شوې، چې امریکايي او ټول بهرني ځواکونه به له افغانستانه ایستل کېږي او افغان خاوره به د هېڅ بهرني هېواد پر ضد نه کارول کېږي. د نوموړي په خبره، د سولې په خبرو کې باید چټکتیا رامنځ ته شي او دواړه لوري باید تر ټاکنو مخکې یوې هوکړې ته سره ورسېږي. ضعیف وايي: ((باید د طالبانو او امریکا ترمنځ د سولې خبرې په شپږو میاشتو کې او تر راتلونکو ولسمشریزو ټاکنو مخکې پایلې ته ورسېږي. که داسې و نه شي، نو ښايي وضعیت تر دې هم خراب شي)).
بل پلو ځینو نورو طالب سرچینو بیا بي بي سي ته ویلي، چې د طالبانو او امریکا ترمنځ د افغان سولې په اړه د هوکړې لومړۍ مسوده چمتو ده او ټاکل شوې چې په روانو مذاکراتو کې د دواړو لورو لخوا ومنل شي. سرچینې ویلي چې دمګړۍ د مسودې پر ژباړه کار روان دی. د ملګرو ملتونو استازي او د ناروې یو پلاوی په تخنیکي برخه کې له دواړو لورو سره مرسته کوي، خو دغه راپورونه په رسمي توګه د امریکا او یا هم طالبانو له لوري نه دي تایید شوي.
طالب سرچینې وايي چې ښايي د طالبانو او امریکا ترمنځ بېرته پيل شوې خبرې، د روانې اونۍ تر پایه دوام وکړي. د دوی په خبره، په روانو مذاکراتو کې ډېر اړخونه شته چې بحث ورباندې کېږي، نو د اړینو او پر ځای پرېکړو لپاره ښایي دا خبرې د اونۍ تر پایه وغځول شي.
بل پلو حکومت بیا وايي چې د سولې لپاره د مرکچي پلاوي په ترکیب کې به تغیرات راولي. وروسته له دې چې د سولې لپاره د حکومت له لوري پر جوړ شوي مرکچي پلاوي نیوکې ډېرې شوې، حکومت هڅه پيل کړې چې دغه پلاوی بدل کړي. د ولسمشر ویاند محمد هارون چخانسوري وایي، چې دوی د پلاوي په ترکیب کې د بدلون پرېکړه کړې ده او په دې برخه کې د دوی کار چټک دی.
تر دې مخکې د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد هم ویلي وو، چې په کابل کې له طالبانو سره د خبرو لپاره د یوه ملي ټیم د جوړولو کار په چټکۍ روان دی.
