د کندهار اوسېدونکي: سیلابونو درانه زیانونه اړولي، خلک بېړنیو مرستو ته اړتیا لري

د کندهار او جنوبي ولایتونو اوسېدونکي بېړنیو مرستو ته اړتیا لري. په کندهار کې ځایي خبریالانو او د مدني ټولنو غړو له سپوږمۍ راډيو سره په خبرو کې ویلي، چې په دغه ولایت کې د سختو سیلابونو له امله خلکو ته درانه زیانونه اوښتي خو حکومت هېڅ راز همکاري نه ده کړې. ددوی په وینا یوازې افغان ځواکونو خلک له خطر ژغورلي دي، نور هېڅ مرستندویې موسسې او حکومت له دوی سره کومه بېړنۍ مرسته نه ده کړې. له کندهار مدني فعال عطا الله ویسا له سپوږمۍ راډیو سره په خبرو کې د حکومت پر بې غورۍ نیوکه وکړه او وايي، چې د کندهار په دامان، ډنډ، ارغنداب، سپین بولدک او نورو سیمو کې سخت زیانونه اوښتي دي، خو حکومت له ولس سره تر دې دمه مرسته نه ده کړې. بل پلو تازه راپورنه وايي چې د کندهار د مرکز په ګډون په څو ولسوالیو کې درنو سیلابونو تر شلو پورې کسان وژلي او ۱۸ نور یې ټپیان کړي دي. د کندهار ملي سوداګرو له خلکو سره مرستې کړې دي، خو حکومت په رسمي توګه تر دې دمه خلکو ته هېڅ راز بېړنۍ مرسته نه ده رسولې.