امریکا د سولې په برخه کې د یوه ټول منلي او ملي پلاوي پر جوړېدو ټینګار کوي. د راپورونو له مخې، د امریکا د بهرنیو چارو وزارت له افغان حکومت څخه غوښتي چې د سولې لپاره دې یو ټولمنلی او ملي پلاوی جوړ کړي. ټاکل شوې وه، چې د امریکا د بهرنیو چارو وزیر مایک پامپیو افغانستان ته سفر وکړي، خو خپل سفر یې د سولې لپاره د یوه ملي پلاوي تر جوړېدو پورې مشروط کړی او ځنډولی دی.
ټاکل شوې چې په مارچ میاشت کې یو افغان پلاوی قطر ته لاړ شي او هلته له طالبانو سره د سولې په اړه مذاکرات او بحث ولري. دوی اوس په کابل کې د دغو مذاکراتو لپاره تیاری نیسي، خو د دغه پلاوي پر ترکیب باندې لا هم نیوکې شته دي. وسله والو طالبانو هم ویلي، چې دوی د یوه مستقل افغان پلاوي سره د خبرو لپاره تیار دي. د دې ډلې ویاندویانو رسنیو ته ویلي، چې که افغان پلاوی مستقل وي او د افغان حکومت تر تاثیر لاندې نه وي، نو طالبانو ورسره خبرې کوي.
افغان حکومت په تېره لیندۍ میاشت کې له طالبانو سره د مذاکراتو په موخه د یوه پلاوي د جوړولو خبره وکړه، خو طالبانو له دغه پلاوي سره له خبرو ډډه وکړه او په خبره یې دوی د حکومت له لوري له جوړ شوي پلاوي سره خبرې نه کوي، خو پر ځای یې د افغانانو له استازو سره خبرو ته تیار دي. په همدې لړ کې امریکا هم پر افغان حکومت فشار اچولی چې یو ملي پلاوی دې جوړ کړي او دغه پلاوی به له طالبانو سره خبرې کوي. په تازه اقدام کې د امریکا د بهرنیو چارو وزیر مایک پامپیو خپل سفر له طالبانو سره د خبرو اترو لپاره په نوي او ټولو خواوو ته د منلو وړ افغان مرکچي پلاوي په جوړولو پورې مشروط کړی او ځنډولی دی.
تر دې وړاندې د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد هم له افغان حکومته غوښتي وو، چې یو با صلاحیته، صادق، ملي او ټولو اړخونو ته د منلو وړ پلاوی دې جوړ کړي او هغه به له طالبانو سره مذاکرات کوي. ده ویلي وو، چې مشورتي لویه جرګه دې د پلاوي تر جوړولو وروسته جوړه شي او دغه جرګه دې پلاوي ته ټول صلاحیتونه او واکونه ورکړي. خلیلزاد تېره پنجشنبه په یوه ټوېټ کې هیله مندي ښودلې وه، چې د پلاوي د جوړولو چارې په بشپړېدو دي.
بلخوا د ولسمشر ویاند هارون چخانسوري بیا وړمه ورځ په یوه خبري غونډه کې وویل، چې له طالبانو سره د خبرو په موخه د پلاوي په ترکیب کې تغیرات راځي. د چحانسوري په خبره، حکومت هڅه کوي څو داسې یو پلاوی جوړ کړي، چې ټولو اړخونو ته د منلو وړ وي، نو ژر به په اوسني پلاوي کې بدلونونه راشي. د دې ترڅنګ ټاکل شوې چې ولسمشر غني به په روانه اونۍ کې له پخواني ولسمشر حامد کرزي، ګلبدین حکمتیار، عبدرب الرسول سیاف، ډاکټر عبدالله عبدالله، محمد محقق او ځینو نورو افغان سیاستوالو او جهادي مشرانو سره وګوري او تر هغه وروسته به د افغان سیاستوالو یو مستقل پلاوی له طالبانو سره د خبرو اترو لپاره د قطر پلازمېنې دوحې ته لاړ شي.
وسله والو طالبانو بیا تېره ورځ ناوخته په یوه اعلامیه کې ویلي، چې دمګړۍ دوی له امریکا سره خبرې کوي او دغه خبرې مهم او حساس پړاو ته رسېدلې دي. د طالبانو ویاند ذبیحالله مجاهد وايي، چې تر دې دمه د هېڅ هوکړې مسوده نه ده چمتو شوې او نه هم دواړه لوري کومې هوکړې ته رسېدلي دي. د مجاهد په خبره، ښایي مذاکرات پر مهمو مسایلو د بحث په موخه دوام وکړي.
