د ولسي جرګې برحاله غړي وایي، که ولسمشر د ملي شورا نوې دوره افتتاح نه کړي، نو دوی به لاس پکار شي. ملي شورا هر کال د کب یا حوت میاشتې په پنځلسمه د ولسمشر او د هغه د مرستیال له لوري پرانیستل کېږي، خو دا ځل د تېرو ټاکنو د پایلو نه معلومېدو او د نوي پارلمان نه معرفي کېدو، دغه لړۍ له مبهم حالت سره مخ کړې ده.
د ولسي جرګې برحاله وکیلان بیا وایي چې که حکومت د کب په پنځلسمه اوسنی پارلمان د برحاله وکیلانو په حضور کې افتتاح نه کړي، نو دوی به پخپله لاس پکار شي. وکیلان وايي، د ولسي جرګې اوسني غړي قانوني صلاحیت لري او د نوي پارلمان تر راتګ پورې خپلو چارو ته ادامه ورکوي. وکیلان استدلال کوي، چې تېرې ټاکنې له درغلیو ډکې وې، لا هم د رایو برخلیک نه دی روښانه، وروستۍ پایلې نه دي اعلان شوې، نو حکومت ته پکار ده، چې د اوسنیو برحاله وکیلانو په حضور کې د ملي شورا پرانیسته وکړي.
پر ټاکنو یوشمېر څارونکي بنسټونه هم وایي، چې په تېرو پارلماني ټاکنو کې پراخې درغلۍ شوې دي، خلک له ټاکنو راضي نه دي او د پایلو اعلان له بنبست سره مخ دی، نو ځکه د اوسنیو وکیلانو په حضور کې باید پارلمان پرانیستل شي.
بل پلو په کابل کې د امریکا سفارت بیا پر حکومت غږ کړی، چې ژر تر ژره دې وروستۍ پایلې اعلان کړي او د ملي شورا دا دوره دې د نویو وکیلانو په موجودیت کې پرانیزي. خو له دې ټولو سره سره، برحاله وکیلان د کب په پنځلسمه د پارلمان په پرانیسته ټینګار کوي. دوی وايي، تېرې ټاکنې له درغلیو ډکې وې، نو اوس که حکومت د اوسنیو وکیلانو په حضور کې پارلمان نه پرانیزي، نو وکیلان تیار دي چې پخپله پارلمان افتتاح کړي.
د ولسي جرګې غړی زکریا زکریا وايي، ولسمشر باید له معمول سره سم راشي او د برحاله وکیلانو په حضور کې پارلمان پرانیزي. زکریا وايي: «معمول خو دا دی چې د حوت په پنځلسمه به ولسمشر راځي او پارلمان به پرانیزي، خو که داسې ونه کړي، دا د وکیلانو دنده ده چې پارلمان پرانیزي. د دوی مسوولیت دی چې خپلو چارو ته ادامه ورکړي، تالار ته لاړ شي او خپله دنده پیل کړي.»
د ولسي جرګې منشي میرداد نجرابي هم وایي، د دوی کار هغه مهال پای ته رسېږي، چې د ټاکنو وروستۍ پایلې اعلان شي او نوی پارلمان کار پيل کړي. هغه زیاته کړې: «د ټاکنو قانونو او همدا راز د اساسي قانون له مخې زموږ دنده هغه وخت پای ته رسېږي، چې نوي وکیلان راشي، د ټاکنو وروستۍ پایلې اعلان شي او که داسې ونه شي، نو د استازو مسوولیت دی، چې په پارلمان کې حاضر وي».
حکومت تر اوسه په دې اړه څه نه دي ویلي، خو تر دې وړاندې په پارلماني چارو کې د دولت وزارت ویلي وو، چې د ملي شورا نوې دوره به د نویو وکیلانو په حضور او موجودیت کې پرانیزي. بل پلو په کابل کې د امریکا سفیر جان باس ویلي، چې نوی پارلمان باید د نویو وکیلانو په حضور کې پرانیستل شي او په دې برخه کې دې هېڅ راز ځنډ نه رامنځ ته کېږي.
خو پر ټاکنو څارونکي بنسټونه وایي، چې د ولسي جرګې په تېرو ټاکنو کې پراخې درغلۍ او تېروتنې د دې لامل شوې، څو د ملي شورا پرانیسته له داسې برخلیک سره مخ شي او که ملي شورا افتتاح نه شي، د مقننه قوې نشتوالی به ډېرې ستونزې جوړې کړي. د ټیفا اجرایه رییس محمدنعیم ایوب زاده وایي، په ټاکنیزو کمېسیونونو کې ستونزې او سیاسي ګومارنې د دې سبب شوې، چې نن د حکومت ډېر بنسټونه د مشروعیت له بحران سره مخ شي. د نوموړي په خبره، حکومت لا هم مصلحتونه مهم بولي او لا هم په داسې مهمو او ملي پروسو کې رښتیني اصلاحات نه راولي.
