په قطر کې د سولې خبرې یوې پېچلې مرحلې ته رسېدلې دي. په همدې لړ کې د روسیې او ازبکستان د بهرنیو چارو وزیرانو دوحې ته سفرونه کړي دي. د ازبکستان د بهرنیو چارو وزیر بیا مستقیم د قطر دفتر له مشر ملا برادر سره لیدلي دي او له هغه سره یې د سولې په برخه کې د هر ډول همکارۍ ژمنه کړې ده. څو ورځې وړاندې د قطر د بهرنیو چارو وزیر هم له ملا برادر سره لیدلي او پر افغان سوله یې بحثونه کړي دي.
ویل کېږي چې له همدې امله به د امریکا د بهرنیو چارو وزیر مایک پامپیو به هم دوحې ته لاړ شي. د راپورونو له مخې، د امریکا د بهرنیو چارو وزیر تازه د افغانستان د سولې پر روانو مذاکراتو څرګندونې کړې دي. هغه (دامریکا راتلونکو کروندګرو) په نوم یوې جوړې شوې غونډه ته د خبرو پر مهال ویلي، چې د افغانستان د سولې مذاکرات پېچلي شوي دي. د ده په خبره، له طالبانو سره خبرې روانې دي، خو دمګړۍ دغه خبرې پېچلي حالت ته ننوتې دي او ډېر کار ته اړتیا لري.
مایک پامپیو د دې ترڅنګ دا هم ویلي، چې د افغانستان د سولې خبرې د پېچلتیاوو ترڅنګ، پرمختګونه هم لري. د نوموړي په خبره، دوی د پېچلتیاوو ترڅنګ شته پرمختګونو ته هیله من دي او داسې هیلې شته، چې افغان جګړه پای ته ورسول شي. د مایک پامپیو په خبره، په افغانستان کې ګاونډیانو او په دې مسئله کې ښکېل هېوادونه خپلې ګټې پالي، نو ځکه یې د مذاکراتو بهیر پېچلی کړی دی. پامپیو ویلي: «د افغانستان د سولې مسئله، دخیلو هېوادونو پېچلې کړې ده. چین، هند، پاکستان یا روسیه دلته خپلې ګټې لري، دوی خپلې ګټې لري، نو ځکه موږ هم له پېچلتیا سره مخ شوي یو.»
مایک پامپیو بیا ویلي چې امریکایي ډيپلوماتان هڅه کوي، چې د سولې په برخه کې رامنځ ته شوي خنډونه او پېچلتیاوې له منځه یوسي. د ده په خبره، په همدې لړ کې ښايي په راتلونکو دوو اونیو کې دی خپله هم قطر ته سفر وکړي او د سولې د خبرو په اسانتیا کې له امریکايي استازو سره خبرې وکړي.
پامپیو داسې مهال قطر ته د سفر خبره کوي، چې په دې نږدې ورځو کې د ازبکستان او روسیې د بهرنیو چارو وزیرانو هم دوحې ته سفرونه کړي وو. دغو سفرونو او لیدنو کتنو په رسنیو کې تود انعکاس لرلی دی، خو تر څنګ یې اندېښنې هم را ولاړې کړې دي. د روسیې د بهرنیو چارو وزیر سرګي لاوروف ویلي وو، چې دوی د افغانستان د سولې په مسئله کې همکارۍ ته تیار دي او له امریکا سره د طالبانو روان مذاکرات څاري. د ده په خبره، امریکا باید دا جګړه د خبرو له لارې پای ته ورسوي او په دې برخه کې د سیمې د هېوادونو همکاري اړینه ده.
د شنونکو په باور، قطر ته د مهمو ډيپلوماتانو سفر په دې مانا دی، چې د سولې خبرې حساسې مرحلې ته داخلې شوې دي، خو له دې هر څه افغان حکومت ناخبره ساتل شوی دی. د سیاسي مسایلو شنونکی وحید مژده وایي، له طالبانو سره په خبرو کې ښايي ډېر پرمختګونه شوي وي، خو له دغو ټولو مسایلو افغان حکومت ناخبره ساتل شوی او تر دې دمه هر څه د تړلو دروازو تر شا روان دي.
بل پلو د سولې عالي شورا د دارالانشا رییس محمدعمر داوودزي پرون په یوه غونډه کې د خبرو پر مهال ویلي، چې د بهرنیو ځواکونو د حضور او وتلو په اړه طالبان او امریکا پرېکړه نه شي کولی. د ده په خبره، امریکا له افغان حکومت سره هوکړې لري او باید دغه هوکړو ته ژمنه پاتې شي. د ده په خبره، امریکا یوازې دا هڅه کوي چې د طالبانو او افغان حکومت ترمنځ د مخامخ خبرو زمینه برابره کړي او تر هغه وروسته به ټولې هوکړې له افغان حکومت سره کېږي، نه له طالبانو سره.
