انډېپنډېنټ: که امریکایان وځي برېتانوي پوځیان یې تشه ډکوي

انډېپنډېنټ ورځپاڼه وايي له برېتانوي ځانگړو ځواکونو به وغوښتل شي چې له افغانستان د امريکايي ځواکونو له وتنې وروسته د ترهگرۍ ضد عملياتو په برخه کې د هغوى تشه ډکه کړي. ورځپاڼې د دفاعي چارو د لوړپوړو سرچينو په وينا ليکلي چې دا غوښتنه ښايي د امريکا د دفاع وزارت د هغو پلانونو له مخې وشي چې په پنټاگون کې ورباندې کار روان دى. د ورځپاڼې په وينا پر دغو پلانونو وروسته له هغه کار پيل شوی چې ولسمشر ټرمپ له افغانستان د امريکايي سرتېرو د ایستلو خبره وکړه. ورځپاڼه وايي، د امريکا هوايي ملاتړ به له افغان ځواکونو سره وي او د امريکا په مشرۍ يو کوچنى ځواک به د داعش او القاعدې پر وړاندې جگړه پر مخ وړي. تمه ده چې د برېتانيا ځانگړي ځواکونه او شاهي سمندري ځواکونه د دغه ماموريت برخه وي. اوسمهال په افغانستان کې څه باندې ١٠٠٠ برېتانوي سرتېري حضور لري چې په مرکزي او ختيځو سيمو کې عمليات ترسره کوي.