استاد سیاف: له سولې مه ډارېږئ، لبیک ورته ووایئ

د سولې له پروسې او په دې برخه کې له روانو مذاکراتو ډار نه دی په کار. پخواني جهادي مشر عبدالرب رسول سیاف د مارشال فهیم د پنځم تلین په غونډه کې د خبرو پر مهال وویل، چې د سولې د هر ډول خبرو هرکلی په کار دی. دده په وینا د سولې خبرې روانې دي، خو یوه برخه خلک له دې خبرو وېره لري او ځان په خطر کې ویني. د سیاف په خبره د سولې له خبرو ډار نه دی په کار، بلکې دغه خبرو ته هرکلی او لبیک ویل په کار دي. هغه زیاته کړه، افغانان باید د هغه سولې ملاتړ وکړي، چې پکې د دولت او ملت عزت خوندي وي. دده په وینا دوی د سولې لپاره هر ډول قربانۍ ته تیار دي او ددې اړتیا ده، چې د سولې له پروسې وېره لرونکي خلک هم قربانیو ته تیار وي. هغه زیاته کړې چې سوله د ټولو په خیر ده او اوس د افغان سولې لپاره تر بل هر وخت ښه فرصت رامنځ ته شوی دی.