د بلک واټر مشر: راتلونکو ټاکنو کې د اشرف غني چانس ډېر لږ دی

د بلک واټر کمپنۍ بنسټګر او مشر اریک پرنس د افغانستان په راتلونکو ولسمشرۍ ټاکنو کې د اوسني ولسمشر اشرف غني چانس ډېر لږ بللی دی. هغه چې لا هم هڅه کوي افغان جګړه خصوصي شي له الجزیري ټلویزیوني شبکې سره په مرکه کې ویلي، دی په راتلونکو ټاکنو کې د ولسمشر غني پر بریا شک لري او فکر نه کوي چې نوموړی دې په راتلونکو ټاکنو کې بریا ته ورسېږي. نوموړي دا نه دي ویلي چې د ولسمشر غني پر بریا ولې شک لري خو داسې ښکاري چې نوموړی لا هم په دې هڅه کې دی چې افغان جګړه خصوصي کړي. بلک واټر چې په بېسارې کچه د ملکیانو په وژلو کې لاس لري له ډېرې مودې راهیسي یې د افغان جګړې د خصوصي کولو هڅه پیل کړې ده. هغه ویلي ټرمپ ته یې په وار وار ویلي چې په افغانستان کې د ډېرو نظامیانو د حضور پر ځای دې ددې جګړې د ګټلو لپاره یو څه ډېرې پیسې مصرف کړي.