د مارشال فهیم په پنځمه تلینغونډه کې ګډون کوونکو، ډېرو سیاسي او جهادي مشرانو او چارواکو په خپل وخت د ولسمشریزو ټاکنو په ترسره کېدو د ټینګار ترڅنګ، د بین الافغاني مذاکراتو غوښتنه کړې.
د یادې ناستې ګډونوال او پخواني جهادي مشر عبدالرب رسول سیاف ویلي، چې په داسې حال کې چې له طالبانو سره د سولې مذاکرات پیل شوي، په کور دننه ځینې کړۍ له طالبانو سره د مذاکراتو له روان بهیره په وېره کې دي.
د سیاف په خبره، سوله د ټولو افغانانو ګډه غوښتنه ده، خو له دې پروسې څخه د وېرې پر ځای باید سولې ته کار وشي. سیاف ویلي چې اوسمهال د سولې خبرو لپاره تر ټولو مناسب فرصت رامنځته شوی او پکار ده چې ټولې خواوې له دغه فرصته مناسبه استفاده وکړي.
په ورته وخت کې پخواني ولسمشر حامد کرزي چې دې ناستې ته یې خبرې کولې، ویلي چې د بین الافغاني مذاکراتو په هدف یې له افغان سیاسیونو سره په همغږۍ هڅې چټکې کړې دي او تمه یې دا ده چې دغه پروسه به بریا ته ورسېږي.
ښاغلي کرزي دغه راز ویلي چې له طالبانو سره یې په همدې موخه ناستې هم پیل کړې او ټول لوري پر دې باور دي چې روانه جګړه پر افغانانو تحمیل شوې ده. نوموړي ویلي، د داسې سولې پلوی دی چې د افغانانو ټولې لاسته راوړنې پکې خوندي وي.
د سولې عالي شورا رییس کریم خلیلي بیا د سولې یو اړخیزه پروسه ناکامه بللې او په باور یې، چې د حکومت ترڅنګ طالبان هم باید له ځینو غوښتنو تېر او سیاسي جوړجاړي ته ورسېږي.
د نوموړي په خبره، د طالبانو او حکومت ترڅنګ هېڅوک حق نه لري چې د افغان سولې پروسې پر وړاندې خنډ رامنځته کړي.
خلیلي زیاته کړې: «موږ نن ورځ د سولې لپاره لویه ملي اجماع لرو او هېڅوک نه شي کولای چې د دې اجماع مخه ونیسي».
جهادي مشران او پخواني چارواکي داسې مهال پر بین الافغانی مذاکراتو ټينګار کوي، چې په پام کې ده د وسله والو طالبانو استازي د مسکو د ناستې په دوام، له افغان سیاسیونو سره بله ناسته هم وکړي او ویل کېږي چې ښایي دا ځل په دغه پلاوي کې د افغان حکومت استازي هم برخه واخلي.
