لاریون کونکو په سیداباد ولسوالۍ کې د کابل- کندهار لویه لار تړلې ده

وروسته له هغه چې وړمه شپه د میدان وردګو ولایت په سیداباد ولسوالۍ کې د شپنیو عملیاتو پر مهال ملکي وګړو ته مرګ ژوبله واوښته اوس ددې ولسوالۍ اوسېدونکو د اعتراض په توګه د کابل- کندهار لویه لار تړلې ده. لاریون کوونکي وایي، په یاده پېښه کې اووه ملکي وګړي وژل شوي چې ښځې او ماشومان په کې شامل دي. دوی وایي، تر هغه به خپل دې اعتراض ته دوام ورکړي، څو یې حکومت غږ واوري، د پېښې څېړنه وکړي او په راتلونکو کې ددې ډول پېښو مخنیوی وکړي. د میدان وردګو ولایت والي مظفر الدین یمین بیا وايي، چې په سیداباد ولسوالۍ کې وروستي هوايي عملیات له دوی سره له همغږۍ  پرته شوي دي. یمین وویل چې په دې عملیاتو کې درې ملکي وګړي وژل شوي دي. نوموړی وايي، چې په داسې عملیاتو کې د دقت لپاره اړینه ده چې له ولایتي چارواکو سره خبرې وشي. د میدان وردګو د امنیې قوماندانۍ ویاند حکمت دراني هم ملکي وګړو ته اوښتې مرګ ژوبله تاييد کړې ده.