حنیف اتمر: د ټولو ستونزو زېږنده غیر مسوولانه حکومتولي ده

د ملي امنیت پخواني سلاکار او راتلونکو ولسمشرۍ ټاکنو ته نوماند محمد حنیف اتمر نن په کابل کې د ښځو د نړیوالې ورځې نمانځغونډه ته وویل، یوازې په تېرو پنځو کلونو کې په هېواد کې ۱۵۰ زره کسانو ته مرګ ژوبله اوښتې ده. نوموړي وویل، په تېرو پنځو کلونو کې د مرګ ژوبلې کچې ته په کتو تر ټولو ډېر اغېزمن شوی قشر ښځې دې چې ټولو یې پر خپل ځای ستره قرباني ورکړې ده. هغه وویل فقر او محرومیت یو بل هغه عامل دی چې ښځې ګواښي. اتمر د دې او ورته نورو ستونزو لامل د حکومت کم کاري ښودلې او زیاته کړې یې ده چې د ټولو ستونزو زېږنده غیر مسوولانه حکومتولي ده. اتمر پر حکومت د خپلو نیوکو پر دوام مشخصاً د ولسمشر غني نوم واخیست چې په خبره یې نوموړی ددې پر ځای چې د خلکو ستونزو ته رسېدګي وکړي خلک خطا کوي او هغه پروژې د دویم ځل لپاره پرانیزي چې یو ځل تر پخوا پرانیستل شوې دي او د نوموړي په باور دا مساله ستونزې لا ډېرولی شي.