د تېرو پارلماني ټاکنو پایلې لا هم له مبهم برخلیک سره مخ دي. په هېواد کې نږدې پنځه میاشتې وړاندې پارلماني ټاکنې شوې دي، خو لا هم د دغو ټاکنو پایلې نه دي اعلان شوې او د ولسي جرګې راتلونکې له ډېرو پوښتنو سره مخ ده. د ولسي جرګې د ټاکنو ځینې نوماندان هم وایي، په داسې حال کې چې د پارلماني ټاکنو له ترسره کېدو نږدې پنځه میاشتې تېرېږي، خو ټاکنیز کمېسیونونه تر اوسه نه دي توانېدلي، چې د ټولو ولایتونو نهايي پایلې اعلان او د نوي پارلمان پرانیستې ته زمینه برابره کړي.
بلخوا د انتخاباتي کمېسیونونو نوي کمېشنران او د دارالانشا ریاست مسوولان وایي، له کابل پرته د پاتې ۱۴ ولایتونو په تړاو به شویو شکایتونو ته تر لسو او پنځلسو ورځو پورې کتنه وشي او تر هغه وروسته به یې نهايي نتایج اعلان شي. د دوی په خبره، د کابل پایلې ځکه په یاده موده کې نه شي اعلانولی، چې د شکایتونو ارزونه یې ډېر وخت غواړي.
د ټاکنیزو شکایتونو د دارالانشا رییس چمن شا اعتمادي وايي، دوی د ولایتونو ټولې دوسیې او مسایل په لسو پنځلسو ورځو کې حل فصل کولی شي. نوموړی وايي: ((له کابل پرته ښایي د نورو ولایتونو د ټاکنیزو شکایتونو مسئله تر لسو یا پنځلسو ورځو حل فصل شي، خو د کابل بیا ډېر وخت غواړي. د کابل ټاکنې تر ټولو جنجالي وې. موږ ډېر وخت ته اړتیا لرو)).
له دې سره د ټاکنو خپلواک کمېسیون مسوولان د پاتې ولایتونو د نهايي پایلو د نه اعلانېدو علت بیا د رهبرۍ تغیر بولي او وایي چې لا هم د کمېسیون نوې رهبري پر اداري کارونو بوخت ده. د دوی په خبره، تر هغه چې د دوی اداري مسایل یوې خوا ته کېږي او د ټاکنو پر وروستیو پایلو او ټاکنیزو شکایتونو بحث کوي، وخت ته اړتیا لري.
د ټاکنو کمېسیون د دارالانشا رییس حبیب الرحمن ننګ وایي: ((تر دې دمه د ټاکنیزو شکایتونو او ټاکنو کمېسیون رهبري خپل اداري کارونه نه دي بشپړ کړي. دومره وخت نه کېږي، دوی به ډېر ژر د ټاکنو پر پایلو او نهایي لېست باندې کار پیل کړي)).
خو شنونکي د ټاکنیزو شکایتونو کمېسیون دغه اقدام د بل ځل لپاره د انتخاباتي قانون نقض بولي او وایي، د ټولو ولایتونو پایلې دې په یوه وخت اعلان شي. د شنونکو په باور، د پایلو په اعلان کې ځنډ قانوني ستونزې جوړوي او په حکومت کې خلا رامنځ ته کوي. شنونکي وايي، اوس باید نوی پارلمان افتتاح شوی وای، خو د نوي پارلمان برخلیک لا هم مبهم دی.
د محمد رحیم رحیمي په خبره، د ټاکنو د وروستیو پایلو په اعلان کې ځنډ قانوني ستونزې پېښولی شي. نوموړی وايي: ((دلته د راتلونکي کال د بودیجې خبره ده، د خلکو د حقوقو خبره ده او د قانون د مراعات کولو خبره ده. ټاکنیز کمېسیونونه باید دې مسایلو ته متوجه وي او پایلې دې پر خپل وخت اعلان کړي)).
د سیاسي مسایلو شنونکی محمد رحیم رحیمي همدا راز د کابل د ټاکنو د پایلو په اعلان کې ځنډ راوستل هم د پوښتنې وړ بولي. د ده په خبره، د کابل پایلې دې هم له نورو ولایتونو سره په یوه وخت اعلان شي او دلته دې بیا ځلې فساد ته زمینه نه برابرېږي.
ټاکنیز کمېسیونونه داسې مهال دغه خبره کوي، چې څو ورځې وړاندې د اوسني پارلمان برحاله غړو د ټاکنو د بیا ځلې ترسره کېدو غوښتنه وکړه. د دوی په خبره، د ولسمشر د پرېکړې له مخې د ټاکنیزو کمېسیونونو پخواني چارواکي د فساد او له صلاحیتونو د ناسمې استفادې په تور له دندو ګوښه کړل شوي دي، نو له همدې امله دغه ټاکنې د نه منلو دي او باید له سره وشي.
