حمد الله محب:  له طالبانو سره سوله په سیمه کې ترهګري نه شي ختمولی

د افغانستان د ملي امنیت شورا سلاکار حمد الله محب د ملګرو ملتونو د امنیت شورا غونډې ته ویلي، له طالبانو سره سوله په دې مانا نه ده، چې ګواکي په سیمه کې به ترهګري ختمه شي. دده په خبره په افغانستان او سیمه کې د ترهګرۍ دایمي ختمول په کار دي او نړیوال دې دا مسئله نه هېروي. هغه ویلي افغان حکومت له طالبانو سره د سولې ملاتړی دی او په ځلونو یې په دې برخه کې طالبانو ته بې قید او شرطه وړاندیزونه هم وکړل، خو طالبان په رښتینې توګه د سولې غوښتونکي نه دي. دده په خبره که طالبان په رښتیا سوله غواړي نو باید له افغان حکومت سره مخامخ خبرو ته حاضر شي. محب په خپلوخبرو کې وویل، چې افغان حکومت له طالبانو سره سولې ته تیار دی، خو دا سوله باید په هر قیمت افغانانو ته تمامه نه شي. دده په خبره په سوله کې باید اساسي قانون، د افغانستان نظام، لاس ته راوړنې او ولسواکي زیانمن نه شي.