په دې وروستیو کې په هوایي بریدونو کې د ملکي وګړو مرګ ژوبله اوج ته رسېدلې ده. تر ننګرهار، میدان وردګو، پکتیا او لغمان وروسته، په تازه پېښه کې په غزني کې ملکي وګړو ته مرګ ژوبله اوښتې ده. د راپورونو له مخې، هوایي ځواکونو د غزني ولایت د اندړو ولسوالۍ په لېوانو کلي کې پر یوه مسافر وړونکي موټر هوایي برید کړی دی. عیني شاهدان او د سیمې اوسېدونکي وایي چې په برید کې ۱۳ ملکي وګړي شهیدان شوي دي.
د سولې له خبرو سره هممهاله په هېواد کې چاڼيز عملیات او هوايي بریدونه اوج ته رسېدلي دي. تر ډېره ویل کېږي چې دغه هوایي بریدونه او چاڼيز عملیات د بهرنیو ځواکونو له لوري ترسره کېږي، خو په ډېری مواردو کې افغان ځانګړي ځواکونه هم په شپنیو عملیاتو کې برخه اخلي او پلټنې کوي. د همدغو عملیاتو په لړ کې په ننګرهار، میدان وردګو، غزني، لغمان او پکتیا ولایتونو کې ملکیان ته مرګ ژوبله اوښتې ده، خو حکومت تر دې دمه د دغو پېښو په مقابل کې کوم غبرګون نه دی ښودلی.
په میدان وردګو کې په تېرو دوو اونیو کې په دوو ولسوالیو کې په هوایي بریدونو کې ملکیانو ته مرګ ژوبله اوښتې ده. لومړی ځل د وردګو په جلګه او دویم ځل د سیداباد په تنګي کې هوايي بریدونه وشول. په دواړو بریدونو کې ملکي وګړو ته مرګ ژوبله واوښته، خو حکومت ادعا کوي چې په بریدونو کې وسله وال طالبان په نښه شوي دي. د میدان وردګو والي هغه مهال له مسیر سره په خبرو کې ویلي وو، چې دوی د پېښې د پلټنې لپاره یو پلاوی ګومارلی دی، خو تر دې دمه د دغه پلاوي د څېړنو او پلټنو پایله له رسنیو سره نه ده شریکه شوې.
په همدې لړ کې، په میدان وردګو او غزني کې د هوايي بریدونو پر ضد لاریونونه هم وشول. حکومت تر دې دمه د لاریون کوونکو پوښتنو ته ځوابونه نه دي ویلي، خو لاریون کوونکي وایي چې د حکومت دا بې پروایي به دوی د توند غبرګون ښودلو ته اړ کړي.
په هوايي بریدونو کې د ملکي وګړو مرګ ژوبله داسې مهال اوج ته رسېدلې، چې څو ورځې وړاندې د ولسمشریزو ټاکنو نوماند حنیف اتمر د ملکي وګړو له بوږنوونکو شمېرو پرده پورته کړه. هغه وویل، چې په تېرو پنځو کلونو کې ۵۱ زره ملکیان وژل شوي او تر ۹۸ زره پورې نور ټپیان شوي دي. د ده په خبره، د حکومت بې پروايي او د ملکي وګړو د ژوند خوندیتابه ته د ژمنو نه عملي کول، د دغه مرګ ژوبلې د لوړېدو ستر لامل دی.
د دې ترڅنګ پخواني ولسمشر حامد کرزي هم د ملکي وګړو پر دغه مرګ ژوبله اندېښنه ښودلې وه. کرزي ویلي وو، چې له یوې خوا د سولې خبرې روانې دي، خو له بلې خوا په هوايي بریدونو کې ملکي وګړو ته مرګ ژوبله اړول سولې ته زیان رسولی شي. هغه پر حکومت هم غږ کړی چې نور دې په هوايي بریدونو کې د ملکي وګړو د تلفاتو مخه ونیسي، ځکه دا به فاصلې ډېرې کړي او له دغو فاصلو به دښمن د خپل ځان په ګټه کار واخلي.
