قریشي: امریکا باید په مسوولانه ډول له افغانستانه ووځي

د پاکستان د بهرنیو چارو وزیر شاه محمود قریشي وایي، پاکستان هغه هېواد دی چې د افغان سولې برخه کې یې ښه رول لوبولی دی، نو له همدې امله له امریکا غواړي چې په مسوولانه ډول له افغانستانه ووځي. هغه ویلي دوی په وار وار دا خبره تکرار کړې ده چې د افغانستان ستونزه له سیاسي لارو د حل وړ ده او دوی خوښ دي چې اوس نړۍ د دې ستونزې د سیاسي حل په لټه کې ده. هغه زیاته کړې چې په مسوولانه توګه له افغانستانه د بهرنیو ځواکونو وتل د پاکستان او ټولې سیمې په ګټه ده. نوموړی دا خبرې په داسې حال کې کوي چې په قطر کې د امریکایي او طالب پلاوي تر منځ د دوحې خبرې له ۱۶ورځي وروسته پرون پای ته ورسېدې. د افغان سولې لپاره د امریکا ځانګړي استازي زلمي خلیلزاد دا خبرې ګټورې بللې دي او زیاته کړې یې ده چې دوی په دې خبرو کې پر یوې مسودې هوکړه کړې ده.