ملګرو ملتونو؛ افغانستان کې دیوناما ماموریت دکال پرځای۶میاشتې تمدید شو

د ملګرو ملتونو امنيت شورا په افغانستان کې د يوناما ماموريت د یو کال پر ځای د شپږو مياشتو لپاره غځولی دی. په ملګرو ملتونو کې د افغانستان د ماموريت په ټويټر ليکل شوي چې امنيت شورا ١٥ غړو د رايو په اتفاق سره د يوناما ماموريت د شپږو مياشتو لپاره وغځاوه. په دغه نړيوال سازمان کې د افغانستان ځانګړې استازې عادلې راز د امنيت شورا د دې پرېکړې هرکلى کړى دى. هغې زياته کړې چې ملګري ملتونه او امنيت شورا د افغانستان سولې، ثبات او پرمختګونو کې خپلو همکاريو ته دوام ورکوي. په امنيت شورا کې د چين او امريکا اختلافات د دې لامل شوی چې د يوناما ماموريت د يو کال پر ځاى په موقتي توګه د شپږو مياشتو لپاره وغځول شوي. د افغانستان دايمي استازې عادلې راز د امنيت شورا غونډې ته ويلي چې له دغو شپږو میاشتو به ګټه پورته کړي، څو د افغانستان په اړه د امنیت شورا یو پراخ پرېکړه لیک ته زمینه برابره شي.