د ولسمشر دویم مرستیال سرور دانش وایي، د ټاکنو په اړه چې هره پرېکړه کېږي باید اړوند لوري پکې وپوښتل شي. هغه دا خبرې نن په کابل کې د امریکا د سفیر له مرستیالې ګرین ډیکر سره د لیدنې پر مهال کړې دي. د دویم مرستیاله له دفتره په خپرې شوې خبرپاڼه کې راغلي، په دې لیدنه کې دواړو لوریو پر سوله، راتلونکو ولسمشرۍ ټاکنو او نورو اړوندو موضوعاتو خبرې اترې کړې دي. دانش په دې لیدنه کې ویلي چې د تېرو پارلماني ټاکنو د وروستیو پایلو اعلان او په شفاف ډول د راتلونکو ولسمشرۍ ټاکنو ترسره کول د حکومت لومړیتوبونه دي او دوی به د دې چارو په مخته وړلو کې خپله ټوله هڅه وکړي. نوموړي د سولې پروسې ته په اشارې ویلي چې سوله د ټولو افغانانو هیله ده او په دې برخه کې د امریکا هڅې د ستاینې وړ دي. نوموړي دغه راز زیاته کړې چې په دې حساس وخت کې باید له داسې څرګندونو ډډه وشي چې د دواړو متحدینو اړیکې زیانمنوي.
