د کابل ښار سوداګر او صرافان ګواښ کوي، که یې حکومت امنیت تامین نه کړي، نو ښایي خپلې پانګې له افغانستانه وباسي. تېره ورځ د کابل ښار صرافانو کاري اعتصاب کړی و او د وروستیو ناامنیو په اړه یې اندېښنه څرګنده کړه. دوی چې شمېر یې لسګونه کسانو ته رسېده، له حکومت غوښتل چې امنیت یې تامین کړي او که داسې و نه کړي، ښايي خپلې پانګې له افغانستانه وباسي. دوی همدا راز د انسان تښتوونکو له لوري د مهسا نومې ماشومې د وژل کېدو په تړاو سخت غبرګون وښود. د صرافانو اتحادیه وايي، چې حکومت په ځلونو ورسره د امنیت د تامین ژمنه کړې ده، خو تر دې دمه یې هېڅ ژمنه عملي کړې نه ده.
څو ورځې وړاندې انسان تښتوونکو په کابل ښار کې د یوه صراف لور تښتولې او بیا یې وژلې وه. دې مسئلې په ټولنیزو رسنیو کې پراخ غبرګون پارولی دی او کاروونکي له حکومته د دغو کسانو د اعدام او قانوني جزا ورکولو غوښتنه کوي. تېره ورځ د کابل ښار صرافانو هم په همدې تړاو خپل توند غبرګون وښود او حکومت یې په بې کفایتۍ تورن کړ.
د کابل صرافانو د اتحادیې مسوولان وايي، چې د روان کال له پیل راهیسې یې د سوداګرو ۱۲ مورده قتل او برمته کېدو پېښې ثبت کړې دي، خو حکومت یوازې په ځینو مواردو کې دغو دوسیو ته رسیده ګي کړې ده. د شپږ کلنې مهسا له وژل کېدو څلور ورځې وروسته، په کابل کې د صرافانو سراسري اتحادیې، د دې پېښې په غبرګون کاري اعتصاب وکړ. دا یوازینۍ پېښه نه ده چې د حکومت د بې کفایتۍ له امله رامنځ ته شوې ده، بلکې که حکومت اقدام ونه کړي، ښایي د لسګونه انسانانو ژوند له ورته برخلیک سره مخ شي.
د کابل ښار د صرافانو د اتحادیې رییس میر افغان صافی وایي، هغه کسان چې نیول شوي باید اعدام شي او هغه چې نه دي نیول شوي، په نیولو کې یې دې حکومت هڅه وکړي. نوموړی زیاتوي: ((هغه کسان چې نیول شوي دي ژر تر ژره دې په علني توګه اعدام شي، هغه کسان چې نه دي نیول شوي باید و نیول شي، ژر دې د قانون منګولو ته وسپارل شي او په علني توګه دې خپله سزا وویني)).
میر افغان صافی وايي، په ځلونو یې له حکومت سره خپلې امنیتي اندېښنې شریکې کړې دي، خو دوی د قناعت وړ اقدامات نه دي کړي. هغه وايي، که حکومت پر وخت د غلاوو، سړي تښتونو او ورته جرمونو قضیې ونه څېړي او مجرمینو ته سزا ور نه کړي، نو دغه ډول پېښې به ورځ په ورځ ډېرې شي.
بل پلو د وژل شوې ماشومې (مهسا) پلار بیا په دغه اعتراضیه غونډه کې د خبرو پر مهال وویل، چې حکومت دې لاس په کار شي او د دې پېښې عاملان دې اعدام کړي. د نوموړي په خبره، د پېښې څېړنې ته اړتیا نه لیدل کېږي، ځکه دواړو مجرمانو اقرار کړی دی او د پېښې پړه یې منلې ده. نوموړی وايي: ((دواړه باید اعدام شي. همدا نن باید اعدام شي، ولې دا مسئله ځنډول کېږي. هغه قاتلان دي او پخپله یې پر خپل جرم اقرار کړی دی)).
د کابل ښار د صرافانو اتحادیې نورو غړو هم پر حکومت نیوکه وکړه، چې قضیه ځنډوي او پر وخت یې په اړه اقدام نه کوي. د کابل ښار د صرافانو مرستیال دادګل حضرت زی وایي، ټول اسناد او شواهد د حکومت په مخ کې پراته دي، باید په اړه یې اقدام وشي. د کابل د صرافانو اتحادیې په دې تړاو په صادر شوي پرېکړه لیک کې ویلي، چې دوی په علني توګه د دغو کسانو اعدام غواړي او که داسې ونه شي، نو ښايي ډېری صرافان خپلې پانګې له افغانستانه وباسي.
د هېواد لویه څارنوالي بیا وايي چې دغه قضیه د دوی تر څېړنې لاندې ده. د لویې څارنوالۍ ویاند جمشید رسولي وایي، د مهسا د قتل قضیه د دوی تر څېړنې لاندې ده او دوی له امنیتي ادارو سره په ګډه د دې قضیې څېړنه پيل کړې ده. د ده په خبره، لویه څارنوالي ژمنه ده او دغه کسان به د خپلو اعمالو سزا ته رسول کېږي.
