سولې شورا: د کابل او واشنګټن سوءتفاهم به د سولې پروسه زیانمنه نه کړي

د سولې عالي شورا وایي، د کابل او واشنګټن ترمنځ سوءتفاهم او ستونزې به د سولې روانه پروسه زیانمنه نه کړي. د سولې عالي شورا هیله لري چې د زلمي خلیلزاد او وسله والو طالبانو ترمنځ د سولې په راتلونکي ناسته کې به د افغان حکومت او وسله والو طالبانو ترمنځ مخامخ خبرو ته زمنیه برابره شي. د دغې شورا مرستیال ویاند اسدالله زائري وویل، د ملي امنیت شورا د سلاکار حمدالله محب او د امریکا د بهرنیو چارو وزارت ترمنځ رووستۍ څرګندونې یوازې یو سوتفاهم دی او دا دومره لویه ستونزه نه ده چې د سولې پر روانې پروسې دې بد اغېز وکړي. هغه ټینګار وکړ چې کابل او واشنګټن د سولې پروسه په پوره قوت سره مخ ته وړي او رامنځته شوي فرصتونه به له ستونزو سره مخ نه شي.