سره له دې چې دننه په حکومت کې افغان چارواکي د امریکا او طالبانو ترمنځ د مخامخ پټو خبرو مخالفت کوي، تازه معلومات ښيي چې د خبرو شپږم پړاو به هم په قطر کې ترسره شي. طالب وسله والو ته نږدې سرچینې وایي، چې د امریکا او طالبانو ترمنځ د مخامخ خبرو شپږم پړاو به د راتلونکې میلادي میاشتې (اپرېل) په اوږدو کې ترسره شي.
د وسله والو طالبانو او امریکا ترمنځ په تېرو شپاړس ورځنیو مذاکراتو کې د پرمختګونو خبره کېږي. وسله وال طالبان او امریکا دواړه وایي چې په دغو خبرو کې یې پرمختګونه کړي دي او مذاکرات یې ګټور وو. امریکا وايي، په دغو مذاکراتو کې پر څلورو مواردو، د یوې مسودې هوکړې ته رسېدلي دي، خو طالبان بیا وايي چې یوازې په دوو مواردو هوکړې رسېدلي او دغه موارد په مسوده کې ځای پر ځای شوي دي.
افغان حکومت بیا په ځلونو د امریکا او طالبانو ترمنځ مخامخ او د پردو تر څټ خبرې غندلې دي او ټینګار کوي چې باید په دغو مذاکراتو کې افغان حکومت هم ګډون وکړي. د افغان چارواکو په خبره، د پردو تر څټ روانې خبرې د هېچا په ګټه نه دي او رښتینې سوله یوازې د افغانانو ترمنځ د مخامخ مذاکراتو پر مټ راتللی شي. امریکا بیا دا ژمنې کوي، چې دوی د مخامخ خبرو لپاره زمینه برابروي او هڅه کوي، چې طالبان دې ته تیار کړي څو له افغان حکومت سره مخامخ خبرې پيل کړي. وسله وال طالبان بیا وایي، چې له افغان حکومت سره نه، بلکې له امریکا سره د ستونزې حل غواړي.
تازه وسله والو طالبانو ته نږدې سرچینو ویلي، چې د خبرو شپږم پړاو به په اپرېل کې پیل شي او له امریکا سره به پر مهمو مسایلو خبرې وشي. د دغو مذاکراتو دقیقه نېټه نه ده معلومه، خو سرچینې وایي چې د اپرېل په لومړیو کې به پیلېږي. بل پلو ټاکل شوې چې افغان سیاسي څېرې، مدني فعالان او ځينې خبریالان هم په راتلونکې میاشت کې دوحې ته لاړ شي او د سولې په اړه له طالب استازو سره لیده کاته ولري.
طالب سرچینو هم دا تایید کړې ده، چې په دغه پړاو کې ښايي پر بین الافغاني مذاکراتو خبرې وشي. افغان سیاسي شنونکي او پخواني طالب چارواکي هم دې ته هیله مندي ښيي، چې په راتلونکو مذاکراتو کې به پر افغاني مذاکراتو خبرې کېږي او د دواړو لورو ترمنځ به د مخامخ مذاکراتو پر پیل بحثونه وشي. پخوانی طالب چارواکی ملا عبدالسلام ضعیف وایي، ډېره هیله مندي شته چې د بین الافغاني مذاکراتو پر پیل هم په همدغه پړاو کې یوه هوکړه رامنځ ته شي.
د طالبانو او امریکايي پلاوي ترمنځ د پنځم پړاو ۱۶ ورځنۍ خبرې اترې، چې شاوخوا یوه اونۍ وړاندې تر سره شوې، امریکا او طالبان له افغانستان څخه د بهرنیو ځواکونو د وتلو او د نورو هېوادونو پر ضد د افغانستان د خاورې د نه کارولو په اړه د مسودې پر نهايي کېدو هوکړه کړې ده.
په ورته وخت کې د افغان سولې لپاره د امریکا ځانګړي استازي زلمي خلیلزاد تازه د ناټو له عمومي منشي سره په لیدنه کې د بهرنیو ځواکونو د وتلو خبره هم کړې ده. ده ویلي، ټول په افغانستان کې سوله غواړي او همدا چې دغه هېواد ته سوله راشي، نو امریکا به د ناټو له نورو غړو هېوادونو سره په ګډه له افغانستان څخه وځي. هغه ویلي: ((موږ د ناټو په مرسته په ګډه په افغانستان کې د ترهګرۍ ضد جګړه پیل کړه، ماموریت مو په ګډه مخ ته وړ، اوس چې د وتلو وخت راځي، نو له ناټو ځواکونو سره به امریکایي ځواکونه په ګډه له افغانستانه وځي)).
بل پلو راتلونکو ولسمشریزو ټاکنو ته ځینو نوماندان وایي، چې تر ټاکنو مخکې باید د افغانستان د سولې مسئله روښانه شي. د دوی په خبره، که داسې ونه شي، نو ښایي راتلونکې ټاکنې ګډې وډې شي او په دې توګه یو ځل بیا د ولس باور ته زیان ورسېږي.
