حتماً تاسې هم له دې پېښې سره مخ شوی یاست، چې په یوه مجلس کې مو تر نورو زیاته توجه خوشحاله او خندېدونکي کس ته اوښتې. همدا وخت هغه کس ستاسې په نظر مهربان، باجرئته او بریالی دی؛ ځکه خو تر نورو خوشحاله دی. کېدای شي همدا شېبه تاسې دا فکر کړی وي، چې ولې تاسې د هغه په څېر خوشحاله نه یاستی.
که د خوشحاله کسانو له ډلې نه یاستی او له دې سره مینه لری، چې د خوشحاله ژوند لپاره مو په کړو وړو او فکر کې بدلون راولی، دغو ټکو ته چې موږ یې په دې مقاله کې درته ذکر کوو، پوره توجه وکړئ!
ټول غواړي چې خوشحاله و اوسي، خو څومره توانېدلي چې خپلې دې غوښتنې ته ورسېږي؟ نویو څېړنو ښودلې چې د ژوند د امکاناتو له مخې، په نړۍ کې د پرمختللو هېوادونو له هرو دریو وګړو یو یې خوشحاله دی. که تاسې خپله خوشحاله نه وی، شاوخوا ته مو یو خوشحاله ژوند لرونکی کس حتماً شته. په دې اړه له ځان سره فکر وکړئ، چې څومره تاسې دغه کسان ستایی او ولې یې ستایی؟ په ډېر دقت د هغوی افکارو او کړو وړو ته توجه وکړئ، څو له هغوی څخه په الهام اخیستو تاسې هم وکولای شی د خپلې خوښې وړ ژوند ته ورسېږی.
موږ دلته درته د همدغه خوشحاله کسانو عادتونه ښیو:
۱-هغوی ښه کسان دي
خوشحاله کسان تل مهربانه او زړه سواندي وي. هغوی چې له هرې ډلې او ټولي سره یوځای شي، مینه ورسره کوي او له هغوی سره ښه وخت تېروي. مانا دا چې هغوی خاکساره، مینه ناک، وفادار او له نورو سره مرسته کوونکي وي. هغوی کینه ناک نه دي او نه هم له نورو سره په حسد او کینه کولو وخت تېروي. هغوی ډېره زیاته حوصله لري او په ډېرې راحتۍ سره خپل کارونه مخکې بیايي. همدغه ځانګړنې کېدای شي د هغوی د خوشحالۍ اصلي ریښې وي.
۲- هغوی رښتيني کسان دي
رښتينې خوشحالې هېڅکله له دروغ سره نه وي. هغه کسان چې ځان ته دروغ وايي، تر ځان بیا نورو ته ډېر دروغ وايي او همغه وې چې بیا یې له ناوړه پایلو څخه په عذاب وي. د رښتیني اوسېدلو لپاره ښه پيل ذهني اګاهي ده. مانا دا چې خوشحال کسان تر هرچا لومړی خپل ځان ښه پېژني او د ځان له رښتینې پېژندنې څخه کومه وېره نه لري.
هغوی تل رښتیني وي، هېڅ وخت هم د ځان ښوودنې او یا خپلې اصلي څېرې د پټولو لپاره هڅه نه کوي. هغوی څنګه چې دي، هغسې ځان ښيي. که نیمګړتیا ولري، ژر یې د حل لپاره کار کوي او که اضافي وخت پيداکړي، د کاروبار د لا ښه والي په اړه فکر کوي.
کله چې ځان ته اجازه ورکړی، چې څنګه یاستی، هغسې و اوسی، ژونددرته ورځ تر بلې اسانه کېږي. دا وخت خپلې ستونزې، تېروتنې، ناسمه غوره شوې لار او بې انګېزې موخې ښې پېژندلی شی.
۳- هغوی د همکارۍ روحیه لري
خوشحاله خلک نه یوازې دا چې پر خلکو یې واک چلول نه خوښېږي، بلکې لوړ موقفونه یې هم نه خوښېږي. هغوی یوازې فردي بریا نه خوښوي او نه د دې لپاره هڅه کوي، چې یوازې دوی د بریا ته ورسېږي، بلکې له نورو سره هم مرسته کوي، څو خپلې موخې ته ورسېږي.
لیدلي به مو وي، کله چې یو لوبغاړی په سیالۍ کې بریا خپلوي، لومړی له هغه چا منننه کوي، چې له هغه سره یې په دې لار کې مرسته کړې وي او هڅولی یې وي. دا کړنه یو ځانګړی رمز لري، هغه دا چې هېڅوک په یوازې ځان نه شي کولای چې خپلو موخو ته ورسېږي او ټول هغه امتیازونه لاسته راوړي، چې د یو کس له وسه وتلې خبره وي.
هغه کسان چې زحمت باسي او له بریا خوند اخلي، دخپلې بریا خوند له نورو سره شریکوي او له ژوند نه خوند اخلي.
۴- هغوی خوږه موسکا لري
له ځان او نورو سره د موسکا پر اغېز څومره پوه یاستی؟ د خوشحاله خلکو له ښو ځانګړنو یوه دا ده، چې هغوی تل په خوله خوږه موسکا لري. ټول کولای شي موسکا وکړي، خو خوشحاله کسان بیا په ټولې انرژۍ او توان سره موسکا کوي.
۵- هغوی په اوس وخت کې ژوند کوي
د وخت هر شېبې ته ارزښت ورکول د خوشحالۍ یوه اساسي ريښه ده. که په اوس وخت کې ژوند کول دومره اسانه وي، نو ولې بیا خلک د تېر په اړه دومره فکر کوي؟
خوشحاله کسان له خپل موقف څخه خوښ وي. هغوی په اوس وخت له هغه څه چې پېښېږي، پوره اګاهي لري او په اړه یې مثبت فکر کوي. دغه کړنه هغوی ته اجازه ورکوي، چې د نورو په خلاف چې خپل ټول وخت په اندېښنه کې تېروي، له خپلو ورځنیو چارو څخه راضي وي او خوند ترې اخلي. که یې چارې سمې مخ ته نه ځي، علت یې پیداکوي او د حل لپاره یې کار کوي.
اخري خبره
د خوشحاله اوسېدو لپاره د لارې طی کول او له خپلو چارو خوښ اوسېدل، اسانه کار نه دی. دغه کار ډېرې خاکسارۍ او زحمت ایستو ته اړتیا لري، چې هر انسان یې په طبیعي ډول نه لري. خوشحاله کسان د ځینو ځانګړو دلایلو له امله محبوب او بریالي وي. هرڅوک چې د هغوی په څېر خوږه موسکا وکړي، بریا ته په غځېدلې لار به یې مزل پيل کړی وي.
له خوشحاله کسانو په لنډ ډول دغه ځانګړنې زده کړئ: خوشحاله کسان نه غواړي چې له نورو سره کینه وکړي او یا نور له دوی سره کینه وکړي. هغوي خوښوي چې خپله بریا له نورو سره شریکه کړي او هغه انګېزه چې دوی له خپل کاروبار څخه اخیستې، له نورو سره شریکه کړي.
همدغه خوشحاله کسان په عین وخت کې نورو ته الګو ګرځي او تل د دې په لټه کې وي، چې نوي څه زده کړي.
همدغه ځانګړنې دي چې موږ له هغوی سره بې کچې مینه لرو. که له خوشحاله او بریالي کس سره اړیکه لری، دا اړیکه مو ټینګه وساتئ او له هغه د ښه ژوند کولو تمثیل زده کړئ.
