کېله پر نورو ګټو سربېره، د سترګو د ځیر لپاره هم یوه ګټوره مېوه ده. دغه راز کېله د عمر په ډېرېدو سره د سترګو د لید د کمېدو خطر کموي.
د اسټرالیا په کوینزلینډ پوهنتون کې په ترسره شوې څېړنه کې ویل شوي، چې په کېله کې کیروټین (Carotene) نومي مواد شته؛ کیروټین مېوو او سبزیجاتو ته سور یا ژېړ رنګ ورکوي.
کیروټین (Carotene) مواد وروسته له هغه چې بدن ته دننه شي، پر ویټامین اې (Vitamin A) بدلېږي؛ ویټامین اې د سترګو د روغتیا او لید لپاره تر ټولو اړین ویټامین دی.
له دې څخه وړاندې په ځینو روغتیايي څېړنو او پلټنو کې ثابته شوې وه، چې کیروټین مواد د سرطان له ځینو ډولونو، د وینې د شریانونو له ناروغیو او له شکر څخه د انسان په خوندي ساتلو کې مرسته کوي.
اوس د یادې نوې څېړنې پر بنسټ، دغه ګټوره مېوه د نورو ګټورو موادو پر لرلو سربېره، د کیروټین موادو غوره منبع هم ګڼل کېږي، کوم چې په بدن کې د ویټامين اې په پوره کولو کې د سترګو د لید لپاره ډېر اړین دي او مهم رول لوبوي.
د څېړنو په پایله کې څرګنده شوې چې په ورځني ډول یوازې د یوې کېلې خوړل، د عمر په زیاتېدو او د سترګو لید ته د پېښېدونکو ناروغیو په مخنیوي کې ډېره زیاته مرسته کوي.
