برېتانیا: د افغانستان څلوېښت کلنه جګړه باید د خبرو له لارې حل شي

په کابل کې د برېتانیا د سفارت شارژدافیر جایلز ليور ویلي، په افغانستان کې څلوېښت کاله جګړه وشوه او هره ورځ د افغانانو وینې تویېږي. دده په خبره دغه جګړه یوازې د خبرو له لارې د حل وړ ده او ښکېلو لورو ته په کار ده چې مخامخ خبرو ته سره کېني. نوموړي ټینګار کړی، چې تر ټاکنو وروسته د نوي حکومت تر ټولو مهم لومړیتوب باید سوله وي او برېتانیا یې ملاتړ کوي. جایلز ویلي هېواد یې تل د سولې په ټولو هڅو کې همکاري کړې ده او تر ټاکنو وروسته هم د سولې له هر ډول هڅو خپل ملاتړ ته ادامه ورکوي. هغه هيله څرګنده کړې چې راتلونکې ټاکنې په امنه فضا کې ترسره شي او افغانان وکړی شي د خپلې خوښې کاندید ته خپله رایه وکاروي.