په کندهار ښار کې هدفي وژنې زیاتې شوي

له تېرو دريو مياشتو راهیسې د کندهار ښار خراب امنيتي وضيعت د ښاريانو اندېښنې زياتې کړې دي. ددې ولايت اوسيدونکي وايي په هره اونۍ کي تر لسو پورې دولتي او ملکي کسان په کندهار ښار کې د غلچکي بريدونو له امله وژل کیږي او دې کار دوی اندېښمن کړي دي. په ورته وخت کي د کندهار د امنيې قوماندانۍ وياند جمال ناصر مني چې په ښار کي امنيتي حالت خراب شوى دى خو وايي چې په روانه مياشت کي يې يو شمير وسله وال کسان په کندهار ښار کي د غلچکي بريدونو په تور نيولي دي او لا هم ددې پيښو د مخنيوي لپاره د امنيتي ځواکونو هڅې روانې دي. کندهار کې د هدفي وژنو په تړاو اندېښنې داسې مهال دي، چې يوه مياشت وړاندې د کندهار په ارغنداب ولسوالۍ کې يو کس د خپلې ماشومې لور د سترګو په وړاندې ووژل شو.