بلقیس روشن: قطري وګړي له پاسپورت او وېزې پرته فراه ولایت ته سفرونه کوي

د فراه والي له قطري وګړو او چارواکو سره پټې معاملې لري. په ولسي جرګه کې د فراه د خلکو استازې بلقیس روشن وایي په دې وروستیو کې له قطر مستقیمې الوتکې فراه ولایت ته راځي او قطري وګړي له وېزې او پاسپورت پرته دغه لایت ته سفر کوي. د نوموړې د ولسي جرګې د نننۍ غونډې په امتیازي ساعت کې وویل، د بهرنیو چارو وزارت باید په دې اړه معلومات ولري چې دغه کسان څوک دي او د څه لپاره له وېزې او اجازې پرته د افغانستان یوه ولایت ته سفرونه کوي. نوموړې د فراه والي هم په شخصي معاملو تورن کړ او په خبره یې دی له قطري وګړو او چارواکو سره د خپلو شخصي ګټو پر بنسټ اړیکې پالې او قطر ته یې سفرونه هم کړي دي. د بهرنیو چارو وزارت تر اوسه په دې اړه غبرګون نه دی ښودلی. بلقیس روشن داسې مهال دغه څرګندونې کوي چې تر دې وړاندې قطري وګړي د ځینو کمیابه مرغانو د ښکار لپاره فراه او هرات ولایتونو ته راتلل، خو د نوو سفرونو په اړه یې معلومات نشته دي.