د تندر قول اردو قومندان د پکتیا له یوه وکیل سره شخړه کړې

په ولسي جرګه کې د پکتیا د خلکو استازی نصیب الله مقبل وايي، چې په یوه امینتي غونډه کې ورته د ۲۰۳ تندر قول اردو د قومندان خان الله شجاع لخوا د پکتیا ولس او ده ته سپکې سپورې ویل شوې دي. مقبل وویل چې تېره اونۍ د پکتیا ولایت په مقام کې د ډنډ پټان ولسوالۍ او ګردیز تر منځ لارې د امنیت په اړه امنیتي غونډه رابلل شوې وه. نوموړی وايي پر دغه لار وخت ناوخت دولتي او ملکي کسان د وسله والو طالبانو له لوري له موټره ښکته کيږي او وژل کېږي. د مقبل په وینا کله یې چې ددغې لارې د امنیت په اړه د ۲۰۳ تندر قول اردو له قومندان وپوښتل، نوموړی دده په خبرو غوسه شو او ساتونکو یې پر ده ګوزارونه وکړل. نوموړی وايي د څو ساعتونو لپاره د قومندان د ساتونکو لخوا کوټه قلفي شوی هم دی. مقبل د ولسي جرګې په امتیازي ساعت کې د خبرو پر مهال وویل، په دې پېښه کې والي او د امنیې قومندان هم ټپيان شوي دي. دی وايي ددې پېښې په اړه ګډ پلاوی ټاکل شوی دی. ده ټینګار کړی چې یاد پلاوی باید په منصفانه ډول قضاوت وکړي.