نبیل: د بحران ختمولو لپاره باید د غني او عبدالله په ګډون ټول قرباني ورکړي

ولسمشرۍ ته نوماند رحمت الله نبیل وایي، هېواد د جنګي بحران په ګډون ټاکنیز بحران سره هم مخ دی او د دې بحران ختمولو لپاره باید د ولسمشر غني او اجراییه رییس عبدالله عبدالله په ګډون ټول قرباني ورکړي. نوموړي چې نن یې په کابل کې یوې خبري ناستې ته خبرې کولې وویل، دا هڅې هم روانې دي چې امنیتي ځواکونه د ټاکنو په بهیر کې ښکېل وساتل شي چې دا چاره د هېواد په زیان تمامېدلی شي. هغه زیاته کړې، دوی د درغلیو پر وړاندې غږ پورته کړی دی او یوازینۍ غوښتنه یې دا ده چې پاکې رایې له ناپاکو هغو جلا شي. نبیل زیاته کړې، د ملي مصالحې حکومت په جوړیدو سره باید د اساسي قانون د تعدیل او د طالبانو د ادغام لپاره کار وشي. نوموړي دغه راز ویلي، هغه سوله چې د پاکستان له ادرسه راځي زموږ لپاره زهر دي. نبیل په خپلو خبرو کې طالبانو ته په خطاب کې ویلي، که دوی فکر کوي چې په زور به کابل ته داخل شي نو له سره دې فکر وکړي ځکه نه نړیواله ټولنه او نه هم خلک دوی ته د دې کار اجازه ورکوي. نوموړي ټینګار کړی دی چې د افغانستان خلک نه امارت غواړي او نه هم داسې یو جمهوریت، چې نورو ته یې ان د سولې په چارو کې لاس اوږود او په تمه وي.