د طالبانو او امریکا تر منځ په ټپه درېدلې خبرې بېرته پيل شوې دي. پرون د امریکا د بهرنیو چارو وزارت ځینو سرچینو رسنیو ته ویلي چې د طالبانو او امریکا تر منځ مخامخ خبرې بیا پیل شوې او تر ډېره تمرکز پر اوربند او د تاوتریخوالي پر کمولو دی. په ورته وخت کې طالب وسله والو هم منلې چې خبرې بیا ځلې پیل شوې دي او دوی تمه لري چېې ژر دواړه لوري مهمو هوکړو ته ورسېږي. د سولې عالي شورا او د سولې په چارو کې د دولت وزارت هم د مذاکراتو بیا پيلېدو ته هیله مندي ښيي.
پرون شاوخوا لس بجې د طالبانو او امریکایي لوري تر منځ له دری میاشتني ځنډ وروسته، د سولې خبرې بېرته پيل شوې. نږدې دری میاشتې وړاندې په کابل کې تر یوه ځانمرګي برید وروسته، د امریکا ولسمشر له طالبانو سره مذاکرات په دې پلمه ودرول چې ګواکې د دې ډلې په ځانمرګي برید کې امریکایي سرتېری وژل شوی دی. له دې سره جوخت داسې هڅې هم روانې وې چې د سولې خبرې بېرته پيل شي او دواړه لوري یوې هوکړې ته ورسېږي، چې له هغه وروسته طالبانو او امریکايي لوري د باور فضا د جوړولو لپاره د زندانیانو پر تبادلې هوکړه وکړه. په دې معامله کې د امریکایي پوهنتون دوه بهرني استادان د حقاني شبکې د دریو غړو د خوشې کولو په بدل کې امریکايي لوري ته وسپارل شول.
تر دې وروسته، تازه د امریکا او طالبانو تر منځ د سولې په برخه کې پرمختګ شوی دی. امریکايي سرچینو تېره ورځ رسنیو ته وویل چې د دواړو لورو تر منځ مذاکرات پيل شوي دي. زلمي خلیلزاد ته نږدې سرچینو ویلي، په ټپه درېدلي مذاکرات پيل شوي او په دې مذاکراتو کې د سولې پر هوکړه او دغه راز د اوربند پر رامنځ ته کېدو بحثونه کېږي. امریکايي سرچینې وایي: ((موخه دا ده چې تاوتریخوالی راکم شي. تر ډېره تمرکز هم د تاوتریخوالي پر کمولو او اوربند باندې دی)).
بلخوا د طالبانو د قطر دفتر ویاند هم په یوه ټوېټ کې منلې چې له امریکايي لوري سره په ټپه درېدلي مذاکرات بېرته پيل شوي دی. سهیل شاهین ویلي، دغه مذاکرات له هغه ځایه پیل شوي، چې د ټرمپ له پرېکړې سره سم درېدلي وو. د شاهین په خبره، نوي مذاکرات به د تېرو په دوام کېږي او له سره خبرې نه پيلېږي. دوی هغه هوکړې بشپړوي چې په تېرو ۹ میاشتنیو مذاکراتو کې ورباندې بحثونه شوي دي. شاهین وايي: ((نن د محترم ملا برادر اخند تر مشرۍ لاندې د اسلامي امارت مذاکراتي ټيم، د امریکې له مذاکراتي ټيم سره خبرې له هغه ځایه پيل کړې، کوم ځای کې چې درېدلې وې. د توافقنامې د لاسلیک او اړوندو موضوعاتو په هکله خبرې وشوې)).
شاهین دغه راز ویلي چې مذاکرات به دوام کوي. د ده په خبره، د هوکړې د لاسلیک او اړوندو موضوعات لپاره به نن هم د طالبانو او امریکايي لوري تر منځ مذاکرات دوام کوي. شاهین داسې مهال د هوکړې د لاسلیک په اړه خبرې کوي چې د سولې عالي شورا غړي هم په نږدې راتلونکي کې د سولې په برخه کې د طالبانو او امریکا تر منځ د هوکړې د لاسلیک کېدو خبره کوي. د دې شورا غړی قاضي امین وقاد وایي، ډېر ژر به د امریکا او طالبانو تر منځ هوکړه لاسلیک شي او دواړه لوري به د جګړې پر درولو سره سلا شي. وقاد وايي: ((د هغې لېوالتیا په نظر کې نیولو سره چې طالبان یې سولې ته لري، هیله ده کم او زیات یوه اونۍ یا لسو ورځو کې دا هوکړه لیک لاسلیک شي. په مذاکراتو کې به اړین مراحل ژر تر سره کړي او بین الافغاني مذاکراتو ته به لاره خلاصه شي)).
په دې مذاکراتو کې د افغان حکومت له بنده ازاد شوی طالب چارواکی انس حقاني هم شامل دی. هغه تازه د طالبانو د مشرتابه د پرېکړې په اساس، د مرکچي پلاوي غړی ټاکل شوی دی. نوموړي په یوه تازه مرکه کې ویلي وو، چې سولې ته لېواله دی او د دې غوښتونکی دی چې په افغانستان کې روانه جګړه ډېره ژر ختمه شي.
بلخوا د سولې په برخه کې د دولت وزارت هم د طالبانو او امریکا تر منځ د سولې د خبرو له پېلدو خبر ورکوي. د دغه وزارت ویانده ناجیه انوري وايي چې په مذاکراتو کې باید اوربند او په پاکستان کې د طالبانو پټنځایونه په پام کې ونیول شي او دغه ډله دې سولې ته خپله رښتینې ژمنتیا وښيي.
