د ټاکنو خپلواک کمیسیون: ناندریو د ختمولو لپاره له ټاکنیزو ټیمونو سره خبرې کوو

ټاکل شوې چې د ټاکنیزو ناندریو د حل لپاره نن د ټاکنو خپلواک کمیسیون او ټاکنیزې ډلې پر یو شمېر مسایلو خبرې وکړي. د ټاکنو خپلواک کمیسیون ویلي چې دوی نن د ټاکنیزو ناندریو د حل لپاره د ولسمشریزو ټاکنو له نوماندانو سره خبرې کوي او غواړي رامنځ ته شوی بحران ختم کړي. تېره ورځ د ولسي جرګې رییس میر رحمان رحماني هم وویل چې ښایي ټاکنیزې ناندرۍ ختمې شي او کمیسیون له نوماندانو سره ستونزه حل کړي. له ولسمشریزو ټاکنو څه باندې دوې میاشتې تېرېږي خو دغه کمیسیون نه دی بریالی شوی چې لومړنۍ پایلې اعلان کړي. د ډاکټر عبدالله ټاکنیزه ډله لا هم اجازه نه ورکوي چې په اوو ولایتونو کې دې د رایو بیا شمېرنه وشي.