پاکستاني رسنۍ: طالبان او امریکا پر ټولو مواردو هوکړې ته رسېدلي دي

پاکستاني رسنۍ وایي طالبان او امریکایي لوری پر ټولو مواردو هوکړې ته سره رسېدلي دي. طالب سرچینو پاکستاني رسنیو ته ویلي چې پر ټولو مواردو هوکړه شوې ده اوس د هوکړې د لاسلیک د نېټې پر مشخصولو کار روان دی. په افغانستان کې د امریکایي ځواکونو قومندان جنرال سکاټ مېلر له طالبانو سره ددوی د سرتېرو د شمېر او ځایونو په اړه معلومات شریک کړي دي او دواړو لورو دا هوکړه هم کړې ده چې پر یو بل به بریدونه نه کوي. پاکستاني رسنۍ وايي د ټرمپ تر سفر وروسته په افغانستان کې پر طالب وسله والو د امریکایي ځواکونو په بریدونو کې د پام وړ کموالی راغلی دی. طالبانو دا هم ویلي چې له امریکایانو سره د جګړې کمول په دې مانا نه دي چې له افغان لوري سره به یې هم جګړه کمېږي. طالبانو په رسمي توګه ددغه سرچینو راپورونه تایید یا رد کړي نه دي.