امریکا او طالبانو تر منځ پر اوربند اختلاف روان دی. طالبانو ته نږدې سرچینې وايي چې د امریکا او طالبانو تر منځ په روانو مذاکراتو کې پر ټولو مواردو هوکړه شوې ده، خو د اوربند پر سر اختلافات موجود دي. پخواني طالب چارواکي وایي چې امریکا پر عمومي اوربند ټینګار کوي، خو طالبان بیا وايي چې دوی یوازې له امریکا سره اوربند ته تیار دي. طالبانو ته نږدې سرچینې دا هم وایي چې له امریکا سره د مسودې تر لاسلیک وروسته به په لسمه ورځ بین الافغاني مذاکرات پيلېږي او په همدې مذاکراتو کې به پر اوربند خبرې کېږي.
له څو ورځو راهیسې د امریکا او طالبانو تر منځ مخامخ مذاکرات روان دي. امریکايي لوری له طالبانو سره پر خبرو لګیا دی او د دې تمه شته ده چې دواړه لوري ژر تر ژره د سولې هوکړه لاسلیک کړي. رسنۍ وايي چې امریکا او طالبان د سولې هوکړې د لاسلیک پر نېټه بحثونه کوي، خو ځینې سرچینې بیا وايي چې د اوربند پر سر د دواړو لورو تر منځ اختلافات روان دي. طالبان ټینګار کوي چې یوازې له امریکا سره اوربند کوي او له افغان حکومت سره د اوربند پر سر به په بین الافغاني خبرو کې بحثونه کېږي. خو امریکا وایي چې باید د دواړو لورو تر منځ یو عمومي اوربند رامنځ ته شي.
طالبانو ته نږدې کسان وایي چې طالبان د جګړې اصلي لوری امریکا بولي، نو له همدې امله لومړی له دغه هېواد سره د سولې هوکړه لاسلیک کول او بیا د افغاني خبرو پیلول غواړي. پخواني طالب چارواکي مولوي قلم الدین وویل: ((هلته چې یو څه تخنیکي مشکلات طالبان لري. اصلاً دلته جګړه او زور د امریکایانو دی، دوی دې هوکړه وکړي، جګړه دې ودروي او همدا چې دا مسئله یوې غاړې ته شي، بین الافغاني مذاکرات پیلېږي. په همدې مذاکراتو کې پر اوربند هم خبرې کېږي)).
پر طالبانو له دې امله په ټولنیزو رسنیو کې نیوکې ډېرې شوې دي چې ګواکې ولې له امریکا سره اوربند، خو له افغان حکومت سره جګړې ته ادامه ورکوي. دغه ډلې ته نږدې کسان وايي چې دمګړۍ مذاکرات له امریکا سره روان دي او د بین الافغاني مذاکراتو په اجنډا کې اوربند هم شامل دی. پخواني طالب چارواکي وايي چې د دواړو لورو تر منځ ډېری موارد حل شوی دي، خو یوازینی خنډ د اوربند مسئله ده، چې امریکا د عمومي اوربند او طالبان بیا یوازې له امریکا سره د اوربند خبره کوي.
طالبانو ته نږدې سرچینې وایي چې له امریکا سره د هوکړې له لاسلیک سره سم به لس ورځې وروسته بین الافغاني مذاکرات پیليږي او په هغه کې اوربند د بحث مهمه موضوع ده. د سیاسي چارو شنونکی عنایت الله کاکړ وایي: ((د هوکړې په موسوده کې دا راغلي چې تر لاسلیک لس ورځې وروسته به بین الافغاني مذاکرات پیلېږي. په همدې غونډه کې به د طالبانو او افغان حکومت تر منځ پر اوربند هم خبرې کېږي)).
بلخوا داسې اندېښنې هم شته چې ښایي د مذاکراتي ټیم او نورو مواردو پر سر د سیاسي جهتونو تر منځ د اختلافونو پر رامنځ ته کېدو بین الافغاني مذاکرات وځنډېږي او دا مسئله جګړه اوږده کړي. د سیاسي چارو شنونکي او دغه راز د پارلمان ځینې غړي دا اندېښنه لري چې له امریکا سره د مذاکراتو تر پای ته رسېدو وروسته، طالبان ښايي له افغان حکومت سره جګړې ته ادامه ورکړي او په دې توګه به په هېواد کې یو بل بحران پيل شي.
د مشرانو جرګې غړی عبدالله قرلق وايي چې د جګړې اصلي قربانیان اوس هم افغانان دي او له اوربند پرته له امریکا سره د طالبانو د سولې خبرې افغانانو ته هېڅ ګټه نه شي رسولی. هغه وايي: ((جګړه افغانان کوي، وژل کېږي افغانان، خو اوربند له امریکا سره کېږي، دا مسئله د افغانستان په ګټه نه ده)).
د مشرانو جرګې یوه بل غړي عبدالولي عليزي وویل چې دا سوله د افغانانو سوله نه ده؛ بلکې د طالبانو او امریکا سوله ده چې افغانانو ته ګټه نه شي رسولی. علیزی وايي: ((د امریکایانو پاتې وسلې به له طالبانو سره وي، امریکا به یې ملاتړ کوي او وژل کېږي به افغانان)).
د اوربند پر سر د اختلافاتو خبره داسې مهال کېږي چې د امریکا ولسمشر ډونالډ ټرمپ افغانستان ته د سفر پر مهال دلته د جګړې د پای ته رسېدو او ژر تر ژره د یوه اوربند د رامنځ ته کېدو خبره هم کړې وه.
