وروسته له دې چې امریکايي ورځپاڼې واشنګټن پوسټ د افغانستان د جګړې په اړه ځینې اسناد خپاره کړل، پر امریکايي حکومت نیوکې ډېرې شوې دي. د افغانستان او نړۍ په کچه وتلو ژورنالېستانو، ډيپلوماتانو، لیکوالانو او سیاستوالو په افغانستان کې د امریکا روانه جګړه پر دروغو ولاړه جګړه بولي او امریکايي حکومت ټولې نړۍ، امریکا او افغانستان ته په دروغو ویلو تورنوي. دوی وایي چې امریکا دې اوس خپلې تېروتنې جبران کړي او له دغه هېواده دې خپل سرتېري وباسي. پخواني امریکایي ډيپلومات راین کراکر ویلي چې امریکا دې د خپلې ماتې په منلو سره له افغانستانه پښې سپکې کړي.
څو ورځې کېږي چې واشنګټن پوسټ د افغانستان د جګړې په اړه مهم اسناد خپاره کړل. په دغه اسنادو کې له امریکايي ډيپلوماتانو، نظامیانو او په افغانستان کې د روانې جګړې له مامورینو سره خبرې شوې دي. دوی ویلي چې امریکايي ولسمشرانو د افغان جګړې په اړه ولس ته دروغ ویلي دي او په دې جګړه کې د وژل شوو سرتېرو مسوولیت هم د دوی پر غاړه دی. دوی دلته روانه جګړه، بې هدفه، پر دروغو ولاړه، بې مانا او خونړۍ بللې وه. تازه ډېرو امریکایي چارواکو، استازو، نړیوالو ژورنالېستانو او ډيپلوماتانو هم پر دغه راپور لیکنې کړې دي او د هغه خپرول یې مهم کار بللی دی.
په افغانستان کې د امریکا یوه پخواني سفیر راین کراکر په همدې تړاو یوه لیکنه کړې ده. نوموړي په دغه لیکنه کې ویلي چې افغانستان د امریکا لپاره دویم ویتنام شو، نو پکار ده چې امریکايي ځواکونه له دغه هېواده و ایستل شي. د ده په باور، امریکايي چارواکي له لومړي سره پر دې پوهېدل چې په افغانستان کې بریا ته نه شي رسېدلی، خو بیا یې هم پر دغه بې مانا، اوږده او ناکامه جګړه باندې میلیاردونه ډالر ولګول. کراکر د پخواني ولسمشر حامد کرزي دا خبره هم تایید کړې چې د امریکا بې حسابه او بې مانا لګښتونو په افغانستان کې پراخ فساد ته هم لاره هواره کړه او په دغه هېواد کې یې نوي کشمکشونه رامنځ ته کړل. کراکر ټینګار کوي چې امریکا دې نور په افغانستان کې خپله ماتې ومني او له دغه هېواده دې خپل سرتېري وباسي.
په ورته وخت کې امریکايي لیکوال اریک مارګولیس په یوه مقاله کې وایي چې امریکا باید د عامو افغانانو د وژلو له امله د شرم احساس وکړي. د ده په خبره، امریکا د ترهګرو په نامه پر عامو افغانانو او طالبانو له درنو بریدونو کار واخیست او زرګونه افغانان یې په یوه نامعلومه جګړه کې ووژل. د ده په خبره، دا د امریکایانو لپاره ستر شرم دی چې د یوې نامعلومه او ناکامې جګړې لپاره یې عام افغانان وژلي دي. تر دې وړاندې مشهورې هالنډۍ لیکوالې بېټي ډم هم ویلي وو چې یوازې امریکا نه، بلکې نړیوال هم باید له افغانانو بښنه وغواړي. د نوموړې په خبره، امریکايي او نورو بهرنیو ځواکونو زرګونه افغانان د یوې بې هدفه جګړې لپاره وژلي دي، نو ځکه پکار ده چې له ټولو افغانانو بښنه وغوښتل شي.
له دې سره جوخت د امریکايي پوځیانو هم ځينې مقالې خپرې شوې دي. یوه امریکایي پوځي مېرمن لارین کې جانس چې په افغانستان کې یې ماموریت تر سره کړی وايي، دنده یې د جګړې په اړه تبلیغات کول وو. نوموړې ویلي، نه یوازې امریکایانو، بلکې افغانانو ته یې هم د جګړې په اړه ناسم معلومات ورکول او د جګړې د تبلیغاتو مسووله وه. نوموړې وایي، دوی نه یوازې افغانان، بلکې لوړپوړي امریکايي چارواکي هم تېر ایستل او د دوی د غولولو لپاره یې منظم پلانونه جوړول. جانس وايي، ښايي د تبلیغاتو له امله یې په ناکامه جګړه کې ډېرې تېروتنې کړې وي او د امریکایي حکومت په دروغو کې شریکه وي.
له دې سره سیاسي او حقوقي فعال عبدالشکور دادرس وایي، نړۍ د بدلون په حال کې ده، نو امریکا ته پکار ده چې حقایق ومني. د ده په خبره، امریکا ناکامه جګړه کړې ده، نو لا هم ډېر وخت دی چې دغه هېواد خپله ماتې ومني او امریکا نه یوازې په افغانستان، بلکې په ټوله نړۍ کې خپلې ماتې ومني.
