لارین کې: د واشنګټن پوسټ راپور سم دی، موږ د افغان جګړې په اړه دوکه بازي او دروغ تبلیغات کول

امریکا په افغانستان کې د جګړې د تیاره اړخونو د پټولو لپاره پراخ تبلیغات کول. امریکايي نظامي افسره لارین کې جانس تازه په یوه مقاله کې ویلي چې دې هم د امریکایي جګړې له تبلیغاتي برخې سره کار کاوه. نوموړې وایي چې دوی په کلو او بانډو کې راډیوګانې ویشلې او له دې لارې یې د جګړې په اړه تبلیغات کول. د جانس په خبره دوی په دې توګه افغانان دوکه کول او د یوې ناکامې جګړې په اړه یې د بریا تبلیغات او راپورونه خپرول. هغه زیاتوي، امریکايي ولسمشرانو نه یوازې افغانانو او امریکایانو ته دروغ ویلي بلکې ددغه جګړې په اړه یې نړیوال هم دوکه کړي دي. د جانس په خبره دا یې ماموریت وو چې تبلیغات وکړي او ان امریکايي چارواکي د افغان جګړې په اړه په خپلو تبلیغاتو تېر باسي، نو ځکه د واشنګټن پوسټ راپور تاییدوي او د افغان جګړې په برخه کې ځان ملامته بولي.