الجزیره: ښايي دداعش ډلې نیمايي وسله وال لا هم په افغانستان کې فعال وي

الجزیرې انګلیسي په یوه تازه راپور کې ویلي دا سمه ده چې افغان او امریکايي ځواکونو په ګډه داعش ډله ځپلې ده خو داسې اټکل کېږي چې ددغه ډلې نیمايي جنګیالي به لا هم په افغانستان کې فعال وي. د سرچینې په خبره ویل کېدل چې دداعش ډلې ۴۰۰۰ کسیزه ډله په افغانستان کې فعالیت کوي چې ښایي له دې ډلې نیمايي یې اوس هم په افغانستان کې فعال وي. په راپور کې راځي چې د هوا د سړښت له امله هم ښایي دداعش ډلې په فعالیتونو کې کموالی راغلی وي نو له همدې امله افغان او بهرنیو ځواکونو ته په کار ده چې ددغه ډلې پر ضد عملیاتو ته ادامه ورکړي. څه موده وړاندې افغان او امریکايي چارواکو خبر ورکړ چې داعش ډله په بشپړه توګه په افغانستان کې ختمه شوې ده. د افغان سولې لپاره د امریکا د بهرنیو چارو وزارت ځانګړي استازي ویلي وو، چې د طالبانو، افغان پوځ او امریکایانو په عملیاتو کې دغه ډله ختمه شوه.